Parlament Májilisiniń depýtaty, “AMANAT” fraktsiiasynyń ókili Ashat Aimaǵambetov dári-dármek baǵasyn tómendetýge baǵyttalǵan reformalar jóninde aqparat berdi, dep habarlaidy Dalanews.kz.
Depýtattyń málimdeýinshe, Densaýlyq saqtaý ministrligi baǵany retteý tetikterin jetildirý arqyly dári-dármek qunyn tómendetýdi kózdep otyr. Bul bastama halyq úshin asa mańyzdy máselelerdi sheshýge baǵyttalǵan.
“Densaýlyq saqtaý ministrligi baǵany qalyptastyrýdaǵy birqatar kemshilikti joiýǵa kiristi. Qazir keibir dárilerdiń baǵasy kórshi eldermen salystyrǵanda áldeqaida joǵary. Sondyqtan baǵany retteýdiń jańa júiesi engiziledi”, – dedi Aimaǵambetov.
Depýtat engiziletin ózgeristerdi atap ótti:
- Baǵany tirkeý boiynsha biryńǵai tásil engiziledi. Shekti baǵalardy qalyptastyrý úshin ortaq bazalyq baǵa belgilenedi. Bul dári-dármek qunynyń negizsiz qymbattaýyna jol bermeidi.
- Negizsiz shyǵyndar alynyp tastalady. Buryn marketing jáne tasymaldaý shyǵyndary 30%-ǵa deiin jetken, oǵan qosa 15% ústeme qosylatyn. Endi bul shyǵyndar qysqartylyp, baǵany tómendetý múmkindigi týyndaidy.
- Kóterme jáne bólshek saýda ústemesi tómendetiledi:
• Kóterme saýdada – 15-20%-ǵa deiin;
• Bólshek saýdada – 20-30%-ǵa deiin.
4. Halyqaralyq referenttik baǵa engiziledi. Endi dárilerdiń quny uqsas halyqaralyq naryqtardaǵy baǵamen salystyrylyp otyrady. Sonymen qatar, dárihanalardaǵy baǵaǵa baqylaý júrgizý úshin biryńǵai referentteý júiesi qoldanylady. Memlekettik organdar aqparattyq júieler arqyly obektivti derekter alyp, baǵany baqylaýda ustaidy.
Aimaǵambetov osy ózgeristerden kútiletin nátijelerdi de aitty:
• Mindetti áleýmettik meditsinalyq saqtandyrý (MÁMS) jáne tegin meditsinalyq kómek (GOBMP) aiasyndaǵy dárilerdiń shekti baǵasy 10-12%-ǵa tómendeidi.
• Kóterme jáne bólshek saýdadaǵy dári-dármek baǵasy halyq úshin 15-25%-ǵa arzandaidy.
Ashat Aimaǵambetovtiń aitýynsha, bul reformalar halyqtyń dári-dármekke jumsaityn shyǵynyn azaityp, júieniń ashyqtyǵyn qamtamasyz etedi.
“Bul – dári-dármektiń qoljetimdiligin arttyrýǵa baǵyttalǵan naqty qadam”, – dedi depýtat.
