Bloger Aleksandr Sokolovskıı taksı quny nege telefonnyń qýaty 10% bolǵanda ósetinin jáne iPhone úlgisi jetkizý baǵasyn 20%-ǵa deıin ósiretinin túsindirdi, dep habarlaıdy Dalanews.kz finratings.kz-ke siltep.

Basylym málimetinshe, taksı men taǵam jetkizý servısteri ár klıenttiń jeke "shegin" anyqtaıtyn algorıtmderdi qoldanady. Baǵa tek suranysqa emes, paıdalanýshy smartfonynyń kúıi men sıfrlyq profıline de baılanysty.

Baǵanyń ósýine áser etetin negizgi faktorlardyń biri - qurylǵynyń qýaty. Qýaty 10%-dan tómen bolsa, agregatorlar tarıfti qymbattata alady. Sebebi mundaı jaǵdaıda adam ýaqyt joǵaltpaı, qyzmetti birden alýǵa beıim bolady.

Ekinshi faktor - smartfon úlgisi. İskerlik aýdandarda sońǵy úlgidegi iPhone ıeleri Android qoldanýshylaryna qaraǵanda 15-20% joǵary baǵa kórýi múmkin.

Aleksandr Sokolovskııdiń aıtýynsha, júıe adam tóleýge daıyn somany eseptep, soǵan saı baǵa usynady.

Onyń aıtýynsha, algorıtmder turaqty klıentterge de jeke tásil qoldanady. Bir meıramhanadan jıi tapsyrys berse, jeńildikter birtindep alynyp, jetkizý qymbattaıdy.

Sarapshynyń sózinshe, biryńǵaı baǵa uǵymy joıylyp barady. Algorıtm paıdalanýshynyń ádetin, tańdaýlaryn taldap, soǵan saı baǵany ózgertip otyrady.