Energetika ministri Almasadam Sátqaliev elde munai ónimderi tapshylyǵynyń aldyn alý úshin jańa munai óńdeý zaýytyn salýdy usyndy, dep habarlaidy Dalanews.kz.
Ministr bul máseleni Májilistegi Úkimet saǵatynda kóterdi. Aitýynsha, 2036 jylǵa qarai jeńil munai ónimderiniń tapshylyǵy kútilýde.
“Sol sebepti qýaty jylyna 10 mln tonna bolatyn jańa munai óńdeý zaýytyn jobalaýdy 2030 jyldan keshiktirmei qolǵa alyp, qurylysty 2032 jyly bastaý mańyzdy”, - deidi ol.
Sátqalievtiń sózinshe, bul joba 2040-2050 jyldar aralyǵynda eldiń janar-jaǵarmaiǵa degen suranysyn tolyq qamtamasyz etip qana qoimai, Ortalyq, Ońtústik jáne Ońtústik-Batys Aziianyń ósip kele jatqan naryqtaryna janar-jaǵarmai eksporttaýǵa múmkindik beredi.
Sonymen qatar ministr Memleket basshysynyń ishki naryqty otandyq bitýmmen qamtamasyz etý qajettigin erekshe atap ótkenin aitty.
“Qazirgi tańda zaýyttardyń jalpy óndiristik qýaty 1,2 mln tonnany quraidy, bul ishki suranysty tolyq jabýǵa jetkilikti”, — dedi ministr.
Aita keteiik, búgin depýtat Baqtyqoja Izmuhambetov jańa munai ken oryndaryn barlaý jumystary jetkiliksiz deńgeide qarjylandyrylyp jatqanyn málimdegen edi.
“Búgin munai óńdeý zaýyttaryna jetkiziletin shikizat týraly aityldy. Otandyq munai óndirýshiler qorlary azaiyp, tiimsiz jobalarmen ainalysýǵa májbúr. Bul aldaǵy jyldary munai óndirý kólemin arttyrýdy bylai qoiǵanda, qazirgi deńgeide ustap turýdyń ózi qiynǵa soǵatynyn kórsetedi. Barlaý jumystaryna erekshe kóńil bólý qajet, alaida bul baǵytta jasalyp jatqan qadamdar jetkiliksiz,” – dedi depýtat.
Sonymen qatar Izmuhambetov geologiialyq barlaýǵa bólinip jatqan qarjynyń tym az ekenin aitty.
“Energetika ministrliginiń málimetinshe, 2030 jylǵa deiin barlaý jumystaryna 5 milliard dollar investitsiia quiylady. Jylyna bul shamamen 1 milliard dollardan az qarjyny quraidy. Alaida bul kólem jetkiliksiz, mundai qarqynmen josparlanǵan jobalardy iske asyrý múmkin bolmaidy. Sondyqtan barlaý salasyna kóbirek qarjy bólý kerek,” – dep túiindedi ol.
Eske salaiyq, buǵan deiin depýtat Edil Jańbyrshin aldaǵy 15 jylda Qazaqstandaǵy kómirsýtek resýrstarynyń qory taýsylýy múmkin ekenin aitqan edi.
Edil Jańbyrshin búgingi tańda memlekettiń esebinde kómirsýtek shikizatynyń 548 ken orny bar ekenin, munai qorynyń jalpy kólemi 4,3 mlrd tonnany quraitynyn eske saldy.
"Kómirsýtek shikizaty qorynyń 72% - y Teńiz, Qashaǵan jáne Qarashyǵanaq siiaqty iri ken oryndaryna tiesili. 10-15 jyldan keiin osy úsh iri kásiporynda munai men gaz óndirý kólemi tómendeitini anyq. Sonymen qatar, igerýdiń kesh kezeńindegi ken oryndarynyń keibirinde munai men gaz óndirisi tómendeidi, keibirinde jumys tipti toqtaidy... Eger geologiialyq barlaýdyń qazirgi baiaý qarqyny jáne munai óndirisiniń búgingi deńgeii saqtalsa, onda aldaǵy 15 jylda kómirsýtek resýrstarynyń qory túgesiledi", - dedi depýtat.
Ol Qazaqstanda jańa sýtekter qoryn ashý úshin bizdegi geologiialyq barlaý salasynyń áleýeti jetkilikti ekenin aitady. Alaida bul baǵyttaǵy jumystar sylbyr júrde. Máselen, depýtattyń aitýynsha, táýelsizdik alǵaly 30 jyl ishinde elimizde bir ǵana jańa ken oryny ashylǵan.
Buǵan deiin osy Úkimet saǵatynda baiandama jasaǵan Energetika ministri Almasadam Sátqaliev biylǵy munai óndirisi kóleminiń kúrt qysqarýyna ne sebep bolǵanyn túsindirgen edi.
