25 qarashada Úkimet basshysy Oljas Bektenov Memleket basshysynyń Joldaýynda qoiylǵan mindetterdi iske asyrý sheńberinde bilim berý, densaýlyq saqtaý, salyqtyq jáne kedendik ákimshilendirý salalarynda tsifrlyq tehnologiialardy engizý máseleleri boiynsha jumys keńesin ótkizdi, dep habarlaidy Dalanews.kz.
Mektepke deiingi uiymdardy vaýcherlik qarjylandyrýdy jáne "Áleýmettik ámiian" jobasyn pilottyq engizý arqyly halyqqa kórsetiletin áleýmettik qyzmetterdi tsifrlandyrýdyń oń tájiribesi qaraldy.
Vaýcherlik qarjylandyrý júiesi mektepke deiingi bilim berýdiń barlyq mekemelerine olardyń talaptaryna sáikes kelgen jaǵdaida memlekettik tapsyrysqa qol jetkizýge jol ashady, ata-analarǵa balabaqshany óz erkimen tańdaýǵa múmkindik beredi, "bilim berý mekemesine emes, qarajatty balanyń sońynan ilestirý" qaǵidaty boiynsha úderistiń ashyqtyǵyn qamtamasyz etedi.
Premer-ministrdiń orynbasary Tamara Dúisenova Taraz, Shymkent jáne Túrkistan qalalarynyń mektepke deiingi uiymdarynda jobany synaqtan ótkizý týraly habardar etti. Bul rette aldyn ala nátijeler josparlanǵan transformatsiianyń naqty tiimdiligin kórsetetini atap ótildi. Mysaly, Tarazda buǵan deiin birneshe jyl kezekte turǵan eki jastan asqan 23 myńnan astam sábi balabaqshalarda orynmen qamtamasyz etildi. Buryn memlekettik tapsyrys almaǵan 19 qalalyq balabaqsha tizimge engizildi. Nebary 2 aida balalardy qabyldaý faktisi boiynsha qarjylandyrý esebinen 600 mln teńge biýdjet qarajaty únemdeldi. Túrkistanda jobany iske asyrýdyń 2 aptasynda 740 vaýcher berildi, balabaqshalarǵa kezek nólge deiin azaityldy. Shymkentte de oń nátijeler bar. Tutastai alǵanda, búginde jobany atalǵan óńirlerdiń qalalary men aýdandarynda iske qosý josparlanyp otyr, ári qarai búkil elimiz boiynsha keńeitiledi.
"Áleýmettik ámiian" jobasyna emhanalar janynda jumys isteitin 726 memlekettik dárihana nemese olardyń 100%-y qosyldy. 947 myń retsept óńdelip, berildi, bul degenimiz jartysynan kóbi. Tiisti sanattaǵy balalardy tegin tamaqtandyrý úshin "Áleýmettik ámiiandy" paidalaný Astana, Mańǵystaý, Aqmola, Batys Qazaqstan oblystarynyń 215 mektebinde júzege asyrylady. 2025 jyly "Áleýmettik ámiian" arqyly sporttyq jáne shyǵarmashylyq tapsyrystardy, sondai-aq demalys lagerlerine joldama bólý josparlanýda.
Dárilik zattardy tańbalaý nátijelerin qaraý kezinde Premer-ministrge 5,5 myńnan astam sýbektiniń esepke alý júieleriniń tolyq integratsiiasy týraly baiandaldy. Tańbalanǵan dárilik zattardyń óndirýshiden sońǵy tutynýshyǵa deiin jetýine avtomattandyrylǵan monitoring júrgiziledi. Búgingi tańda 88,5 mln dárilik zat tańbalanǵan.
Oljas Bektenov tsifrlandyrýdy engizý tirkeýdi alyp tastaýǵa, turǵyndarǵa memlekettik qyzmet kórsetýdiń tiimdiligin arttyrýǵa jáne biýdjet qarajatyn jumsaýǵa baǵyttalýy tiis ekenin atap ótti. Óńir ákimderine vaýcherlik qarjylandyrý boiynsha pilottyq jobany iske asyrýdy qamtamasyz etý tapsyryldy. Sondai-aq mektepterdi "Áleýmettik ámiianmen" integratsiialanǵan apparattyq-baǵdarlamalyq keshendermen jabdyqtaý qajet. Densaýlyq saqtaý jáne qarjy ministrlikteri "Qazaqtelekommen" birlesip — baqylaýdy kúsheitýi jáne ainalymda tańbalanbaǵan dárilik zattardy ótkizýge jol bermeýi tiis.
Sondai-aq salyqtyq, kedendik ákimshilendirýdi tsifrlandyrý, biýdjetti josparlaý jáne atqarý máselelerine nazar aýdaryldy. Qarjy vitse-ministri Áset Turysov tsifrlyq sheshimderdi engizý jáne jańa jobalardy iske qosý boiynsha atqarylǵan jumystar týraly baiandady. Qarjy ministrligi memlekettik biýdjettiń oryndalýyn qadaǵalaýǵa, qarajattyń tiimdi josparlanýy men jumsalýyna baqylaýdy kúsheitýge baǵyttalǵan "Onlain biýdjettik monitoring" jobasyn iske asyrýda. Eger buryn tekserýler "qolmen basqarý rejiminde" júrgizilse, qazir júiede 150 mln-nan astam tólem óńdelýde. Ishki memlekettik aýdit komiteti táýekeldi tólemder bóliginde aldyn alý sharalaryn taldap, qabyldaidy. Osy jumys aiasynda biýdjetke 4 mlrd teńgeden astam qarajat qaitaryldy.
Memlekettik múlikti qaita bólý jáne biýdjet qarajatyn únemdeý úshin pilottyq rejimde Tapsyru servisi iske qosyldy. Platforma uiymdarǵa balanstan balansqa berý rásimin jáne birlesken sharttar tetigin odan ári jeńildete otyryp, talap etilmegen múliktiń biryńǵai tizilimin qalyptastyrýǵa múmkindik beredi. Búgingi tańda Topsyru-da 721 qatysýshy jáne 313 myńnan astam aktiv tirkelgen.
Budan basqa, 2025 jyly Qarjy ministrliginiń aqparattyq júieleriniń jeke kabinetterine qol jetkizýge qosatyn "Kásipkerdiń biryńǵai jeke kabineti" portalyn iske qosý josparlanýda. Biryńǵai interfeis qyzmetterdiń bytyrańqylyǵy men derekterdiń qaitalanýy máselesin sheshýge baǵyttalǵan. Sonymen qatar ol biznes-jaǵdailardy basqarý jáne memlekettik organdar men kásipkerler arasyndaǵy ózara is-qimyl úderisterin edáýir jeńildetedi.
Premer-ministr tsifrlyq sheshimderdi engizý boiynsha júrgizilip jatqan jumystar kóleńkeli ekonomikaǵa qarsy kúreste naqty áser etýi, salyqtyq jáne kedendik ákimshilendirýdiń tiimdiligin arttyrýy, sondai-aq biýdjet qarajatyn utymdy josparlaý men jumsaýdy qamtamasyz etýi tiis ekenin atap ótti.
Keńes qorytyndysy boiynsha jaýapty memlekettik organdar men vedomstvolarǵa barlyq jobany tolyqqandy ári sapaly iske qosý boiynsha jumysty jedeldetý tapsyryldy.
