Respýblıkadaǵy ekologıa jáne ornyqty damý máselelerine nazar aýdarýǵa, qorshaǵan ortany saqtap, ekologıalyq mádenıetti qalyptastyrýǵa baǵyttalǵan «Taza Qazaqstan» aksıasy jalpyhalyqtyq eko-chellendjge aınaldy.
Búginde atalǵan aksıaǵa elimizdiń erikti jastary men belsendi stýdentteri aıanbaı atsalysyp, ózderiniń qoǵamǵa qamqorlyqtaryn, tabıǵatqa uqypty qarap, ony jaqsartýǵa degen umtylystaryn kórsetip júr. Máselen, Abaı atyndaǵy QazUPÝ-da ýnıversıtet jastarynyń belsendiligimen birneshe márte senbilik uıymdastyrylyp, Almatynyń ártúrli aımaqtaryn tazalaý jumystary júrgizilip turady.
Stýdentter men oqytýshylar kóshelerdi, saıabaqtardy, ózen jaǵalaýlaryn qoqystan tazalap, qoǵamǵa tazalyq mádenıetin nasıhattaýdy dástúrge aınaldyrǵan. Bul sharalarǵa ýnıversıtettiń túrli fakúltetterinen qala tazalyǵyna úles qosamyn degen júzdegen erikti stýdent qatysady. Mundaı ıgi bastamalar ujymdyq is-árekettiń jáne bolashaq urpaq aldyndaǵy jaýapkershiliktiń mańyzdylyǵyn aıqyndaıdy.
Sondaı-aq, Abaı ýnıversıtetinde «Aınalańdy taza usta», «Ekologıalyq mádenıet – bolashaqqa degen qadam», «Abaı ýnıversıtetiniń jastary ekologıalyq bastamalardy qoldaıdy» syndy aksıalar jıi ótkizilip turady. İs-sharalar barysynda ýnıversıtet bilim alýshylary qoǵamdyq oryndarda tazalyq jumystaryn júrgizip qana qoımaı, qala turǵyndaryna ekologıalyq mádenıettiń mańyzdylyǵyn túsindirip, olardy qorshaǵan ortany qorǵaýǵa shaqyrady.
Abaı ýnıversıtetiniń oqytýshylary men stýdentteri osylaısha elimiz ben álemdegi ekologıalyq jaǵdaıdy jaqsartýǵa belsendi atsalysyp otyr. Olar mundaı sharalarǵa shabyttana qatysyp, aınaladaǵy adamdarǵa tabıǵatty qorǵaýdyń mańyzdylyǵy týraly túsinik qalyptastyrýǵa múmkindik beredi.
Abaı ýnıversıtetiniń jastary ekologıalyq sanany arttyrý maqsatynda «Kóliksiz kún» aksıasyn da uıymdastyrdy. Bul kúni stýdentter men oqytýshylar ózderi úlgi bola otyryp, barlyq turǵyndardy jeke avtokólikterdi paıdalanýdan bas tartyp, qoǵamdyq kólikpen, velosıpedpen nemese jaıaý júrýdi qoldaýǵa shaqyrdy. Aksıanyń maqsaty – zıandy gazdardyń aýaǵa taralýyn azaıtý jáne ekologıalyq ómir saltyn nasıhattaý. Kóliksiz kún aksıasy aıasynda mundaı sharalardy jıi ótkizip turý qorshaǵan ortaǵa ǵana emes, sonymen qatar adamnyń densaýlyǵyna da oń áser etetini týraly keńinen aıtyldy. Aksıa ekologıalyq mádenıetti nyǵaıtyp qana qoımaı, qoǵamnyń barlyq sektorlarynyń taza jáne salaýatty bolashaq úshin kúrestegi kúsh-jigerin biriktirýge arnalǵan.
Qorshaǵan ortaǵa janashyrlyq, tabıǵatqa taza ári uqypty qaraý – árbir azamattyń paryzy. Abaı ýnıversıtetiniń jastary bul bastamalarymen barsha qazaqstandyqtarǵa úlgi bolyp otyr. Oqý orynynyń stýdentteri ekologıalyq jobalardy qoldaýdy jáne damytýdy belsendi túrde jalǵastyrady degen senimdemiz.
Móldir Rásil
