– Resei áskeri Ýkrainaǵa basa-kóktep kirerden 1 kún buryn, 22 aqpanda Sadyr Japarov Feisbýktegi paraqshasynda eleń etkizgen post jariialady. Onda ol bir jaǵynan, taraptardy bitimge kelýge, jaǵdaidy tek beibit, diplomatiialyq jolmen sheshýge shaqyrdy.
Ekinshi jaǵynan, Donbasstyń jurtshylyǵyn qorǵaý úshin áskeri operatsiia júrgizýdi aqtaǵandai pikir bildirdi ("Vozmojno, eto byla vynýjdennaia mera dlia zashity mirnogo naseleniia territorii Donbassa, gde projivaet bolshoe kolichestvo rossiiskih grajdan").
Meniń oiymsha, sol kezde ol búkil Ýkrainany tez jaýlap alýǵa Reseidiń kúsh-qýaty artyǵymen jetedi, sondyqtan bul jaǵdai tez tynyshtalady dep eseptese kerek. Demek Máskeýdiń qyryna ilikpeý úshin ony jaqtap ta sóilep qoiǵan jón degen bailamǵa kelgenge uqsaidy.
Biraq Kremldiń kózdegeni bolmady. Ýkraina halqy eki aptadan artyq ýaqyttan beri dushpanǵa qarsy janqiiarlyqpen shaiqasýda. Reseidiń adam jáne áskeri tehnika shyǵyny endi alapat. Kremldiń bedeli túse bastady, RF ekonomikasy ózgege kómektespek túgil, ózin qorǵai almaityn hálge jetti.
Búkil álem Reseiden teris ainalýda. Osyǵan orai bizdiń basshylardyń da basy qatty. Bul jaǵdaida ne isteý kerek? Bálkim, Reseidi tastap ketken jón bolar? Máskeýmen dostyqtan bas tartýǵa týra kelýi múmkin.
Endigi másele – tym kesh bolyp qalmaýy úshin ony qai kezde jasaǵan jón? Qazir búkil Ortalyq Aziia elderi úshin eń mańyzdysy – Qazaq eliniń ári qarai ózin qalai ustaityny. Aimaqtaǵy barlyq respýblikalar arasynda eń qaýipti jaǵdaida qalǵany – Qazaqstan.
Sebebi ol – Ortalyq Aziiadaǵy Reseimen shektesetin jalǵyz memleket. Onyń Reseimen qurlyqtaǵy shekarasy – álemdegi eń uzaq shekara. Bul rette onyń soltústiginde separatistik kóńil-kúiler baiqalady.
Mundai qaýip ásirese, 90-shy jyldary óte zor bolatyn. Ony azaitý úshin Qazaqstan basshylyǵy el astanasyn ońtústiginen soltústigine qarai kóshirdi. Nátijesinde, eldiń ortalyǵy men soltústik oblystaryndaǵy reseishil kúshter aitarlyqtai azaidy. Áitkenmen qaýip saqtalýda.
Ol qaýipti seiiltý úshin memleket el birligin kúsheitýge jáne soltústik óńirlerge qazaǵy qalyń ońtústiktegi halyqty kóshirýge kúsh salyp jatqany málim.
Buǵan qosa alyp muhittar men teńizderge shyǵa almaityn Qazaqstan ekonomikalyq turǵydan Reseige táýeldi. Osy jáne basqa da faktorlar Qazaqstandy Máskeýmen shekisýden aiaq tartýǵa itermeleidi.
