Májilis depýtaty Ardaq Nazarov Qazaqstanda AES-tiń salynýyna qatysty oiyn aitty, - dep habarlaidy Dalanews.kz.
Nazarov AES-tiń salynýyna mamandar jaqsy baǵa berip otyrǵanyn aitady.
«Soǵan bailanysty bolady, Qudai qalasa. Damyǵan memleket retinde bolashaqta báribir kerek bolady», - deidi Nazarov kýlýarda «Ulysmedia» tilshisine bergen jaýabynda.
Depýtat referendýmda qalai daýys beretinin aitty.
«Iá» dep jaýap beremin. Qoldaimyn. Pikir ár kezde aitylady. Pyshaqtyń eki tusy sekildi, durys ne burys pikir bolady. Ǵalymdardyń kóbi qoldap jatyr, keibireýi qarsy shyǵyp jatyr. Báribir erte me, kesh pe - biz buǵan kelemiz. Sebebi munai da, kómir de bitedi», - deidi depýtat.
Nazarov AES-ti Resei salýy múmkin degen pikirge qatysty oiyn aitty.
«Ol jerde saiasi sheshimder qabyldanady. Ýaiymdaýǵa bolmaidy. Apattyq jaǵdai kez kelgen nársede bolady. Qudai saqtasyn. Meniń oiym – jaqsy jaǵynan bolsa eken, elimizge paidaly bolsa eken deimin», - deidi Ardaq Nazarov.
Buǵan deiin AES-ke bailanysty óner ieleri jappai pikir bildire bastaǵan bolatyn.
Olardyń basym kópshiligi álemjelide atom elektr stantsiiasynyń qurylysyna qatysty azamattyq ustanymdaryn bildirýde.
Máselen, buǵan deiin Qairat Nurtas Shymkent qalalyq shtabynda AES salýdy qoldaitynyn jetkizip, halyqqa úndeý jasaǵan edi. Ol Memleket basshysy Qasym-Jomart Toqaevtyń Joldaýynda jariialanǵan jalpyhalyqtyq referendýmdy mańyzdy qadam retinde qarastyratynyn jáne 6 qazan kúni ótetin referendýmda belsendi túrde qatysatynyn málimdedi.
Al ánshi Merýert Túsipbaeva AES qurylysyna qarsy ekenin atap ótti. Onyń aitýynsha, AES tek ekologiialyq qaýip qana emes, bolashaq urpaqtyń densaýlyǵyna da úlken ziian ákelýi múmkin.
“Men bolashaq urpaqtyń, balalarynyń densaýlyǵyna alańdaityn árbir azamattyń bul máselege bei-jai qaramaýy tiis dep oilaimyn”, – dedi ol.
Sonymen qatar belgili óner ieleri Qudaibergen Bekish pen Jeńis Ysqaqova da osy másele tóńireginde jeke kózqarasyn bildirýde tartynyp qalmady.
“AES Qazaqstanǵa ne úshin kerek? Ony salýǵa ne úshin qumartyp otyr? Munyń astaryna áli boilap kórmedim. Sondyqtan kerek nemese kerek emes dep kesip-piship aita almaimyn. Degenmen, 1986 jyly Ýkrainadaǵy Chernobl apaty adamzat sanasynan áli óshe qoimady. Chernobylde bolǵan jaqyndarym apat saldarynan onkologiialyq aýrýǵa shaldyqty.
Osy rette bul bir ǵana biliktiń emes, búkil halyqtyń talqysyna súiene otyryp sheshetin másele. Eger aqyry salýǵa oqtalsa, damyǵan ári tájiribesi mol Japoniianyń mamandaryna senim artqan jón dep sanaimyn. Sebebi, japondyqtar Semei poligonyn ótkergen bizben taǵdyrlas halyq bolǵandyqtan, munyń qyr-syryn jaqsy biledi dep oilaimyn”, - dep jaýap berdi Qudaibergen Bekish Nege.kz portaly joldaǵan saýalǵa.
Jeńis Ysqaqova da áriptesiniń sózin qostai ketti. Onyń aitýynsha, AES qurylysynan kelip-keter paida joq.
“Bázbireýler AES basqa memleketterde bir emes, ekeýden bar degendi aityp jatyr eken. Biz buǵan deiin de AES-siz de ómir súrip kelgen elmiz ǵoi. AES bolmaǵandyqtan osyndai tarshylyqta kún keship jatpaǵan shyǵarmyz. Ekinshiden, ony salý úshin qyrýar qarjy ketedi. Sol aqshany ózge máselelerdi ońtaily sheshýge nege salmasqa?! Máselen, jurttyń alatyn ailyǵy infliatsiianyń saldarynan jumyrǵa juǵymsyz bolyp jatyr. Bul álbette kóptegen otbasynyń turmystyq jaǵdaiy álsirep, “shyqpa, janym, shyqpamen” otyrýyna ákeldi. Bilimdi ári saý urpaq qalyptastyrý jolynda ustazdar men dárigerlerdiń jalaqysyn nege kótermeske?!”, - deidi óner iesi Nege.kz portalyna bergen suqbatynda.
Osy tusta ánshi bul sheshim halyqtyń kóńiline kúdik uialatatynyn alǵa tartty.
