Qaraǵandy oblysynyń Qarqaraly qalasynda Eýropalyq Odaqtyń qarjylyq qoldaýymen "Glocal Qazaqstanda ODM-dy (Ornyqty damý maqsattary) lokalizatsiialaýdy ilgeriletý" jobasynyń ashylýy ótti, dep habarlaidy Dalanews.kz.
"Atalmysh joba eki pilottyq aýdandy, atap aitqanda – Qaraǵandy oblysy Qarqaraly qalasy men Qyzylorda oblysy Qamystybas aýylynda azamattyq qoǵamnyń qatysýyn keńeitý arqyly ODM tiimdi basqarýdy ilgeriletý men lokalizatsiialaýǵa baǵyttalǵan. Jobany iske asyrý nátijesinde ODM-dy lokalizatsiialaý arqyly jergilikti damýǵa aýmaqtyq tásildiń (TALD) tiimdi modelin engizý kútilýde", delingen Ulttyq ekonomika ministrligi baspasóz qyzmetiniń 30 qyrkúiekte taratqan habarlamasynda.
Is-sharaǵa QR Ulttyq ekonomika ministrligi departamentiniń direktory Nurgúl Jannazarova, Qarqaraly aýdanynyń ákimi Ádiljan Arǵynov, joba direktory Qaisha Atahanova, sondai-aq "Bastamany qoldaý" jáne "EKOTsENR" qoǵamdyq uiymdary men ÚEU ókilderi qatysty.
Óz sózinde ekonomika ministrliginiń ókili Ornyqty damý maqsattaryna qol jetkizý halyqtyń ómir súrý sapasyn jaqsartýǵa, úzdik halyqaralyq standarttardy engizý arqyly ashyq jáne inkliýzivti qoǵam qurýǵa baǵyttalǵanyn aitty.
Núrgúl Jannazarova óńir jurtshylyǵynyń ornyqty damý maqsattaryn júzege asyrýǵa qatysýy men úlesi mańyzdy ekenin atap ótti. Sondai-aq ol turaqtylyq máseleleri boiynsha óńirlik máselelerdi sheshýde mundai sharalardyń mańyzdy ekenin de aitty.
Jobada azamattyq qoǵam jáne jergilikti bilik organdary ókilderiniń jergilikti damý josparlaryn (JDJ) ázirleýi men iske asyrýǵa qatysýy kózdelgen. Úkimettik emes uiymdardyń ókilderi qoǵamdyq pikirdi zerdeleý arqyly Qazaqstanda ODM iske asyrý monitoringin júrgizýge, sondai-aq saiasatty ázirleý jónindegi jahandyq, ulttyq ári jergilikti dialogtarǵa qatysatyn bolady.
Qatysýshylar óńirlerdegi ómir súrý sapasyn jaqsartý úshin ornyqty damýdyń óńirlik institýtsionaldyq tetikteriniń ózektiligin jáne olardyń jalpy eldegi ODM-ǵa qol jetkizýge yqpalyn atap ótti.
Joba direktory Qaisha Atahanova is-sharaǵa qatysýshylarǵa alǵysyn bildirip, shaǵyn qalalar deńgeiinde ODM-dy lokalizatsiialaý jobalary tiimdi júzege asyrylatynyna senim bildirdi.
PS Ekonomikalyq jáne áleýmettik damýdyń barlyq salasyn qamti otyryp, qorshaǵan ortaǵa ziian keltirmeitindei damý jolyna túsý turǵysynda Birikken Ulttar Uiymynyń
quramyndaǵy 193 el birlesip otyryp, "2030 jylǵa deiingi Ǵalamdyq kún
tártibin" qabyldady. Ony qysqasha "Ornyqty damý maqsattary" dep ataidy. Turaqty damý maqsattary - jer sharyn qorǵaý men beibitshilikti qoldaý úshin qabyldanǵan álemdik maqsattar. Turaqty damý maqsattary 2030 jylǵa deiin 17 maqsattyń júzege asyrylýyna jumys jasaidy. Sonyń ishinde ol kedeishilikti túbirimen joiýdy da qamtidy.
