Jańa mektepte ashylý saltanatyna oblys ákimi Ermek Marjyqpaev, Oqý-aǵartý mınıstri Ǵanı Beısembaev, Qosshy qalasynyń ákimi Gaıdar Qasenov, «Vernyı Kapıtal» ınvestısıalyq tobynyń bas dırektory Erlan Ospanov, «Bolat Ótemuratov» qory Qamqorshylyq keńesiniń tóraǵasy Almas Sharman, t.b resmı qonaqtar, ata-analar qatysyp, júrekjardy tilekterin arnady.
Jeke ınvestısıa esebinen salynǵan 1500 oryndyq mektep-gımnazıanyń ashylý saltanatynda oblys ákimi Ermek Marjyqpaev Memleket basshysynyń tapsyrmasymen bıylǵy jyly óńirde 10 mekteptiń qurylysy bastalǵanyn, olardyń deni 2024 jyly paıdalanýǵa beriletinin aıtty. Jańa qurylystar negizinen Astana qalasynyń mańyndaǵy Arshaly, Selınograd, Shortandy aýdandary jáne Qosshy qalasynda ornalasqan. Sonyń ekeýi búgin Qosshy qalasynda ashylyp otyrǵanyna rızashylyǵyn bildirdi.
«Qosshy qalasynda turǵyndar sany jedel ósýine baılanysty mektep tapshylyǵy týyndap, balalardy úsh aýysymmen oqytýǵa týra keldi. Bul problemany sheshý úshin 2022 jyly 1200 oryndyq bir jańa mektep ashyldy. Endi mine ekeýiniń qurylysy aıaqtalyp, paıdalanýǵa berilip jatyr. Sondaı-aq, «Jaıly mektep» ulttyq jobasy aıasynda 2024-2025 jyldar kezeńinde 3 mektep salý josparlanǵan. Bul bilim oshaqtaryndaǵy shamadan tys júktemeni azaıtyp, úsh aýysymdyq oqý júıesin joıýǵa septigin tıgizdi» dep atap ótti Ermek Boranbaıuly.
Aıta keteıik, bıyl memlekettiń qoldaýymen respýblıka boıynsha 130 myń oqýshyǵa arnalǵan 154 mektep iske qosylmaqshy. Onyń 55 myń oqýshyǵa arnalǵan 39 mektebi 1 qyrkúıekte esigin aıqara ashty.
«Búgingi kúni Qazaqstan boıynsha 3 mıllıon 9 myń oqýshy alǵash ret mektep tabaldyryǵyn attap, sizdermen birge toılap jatyr desek bolady. Onyń ishinde 400 myńǵa jýyq búldirshin 1 synypqa barsa, 18 myńnan astam 11 synypty bitirmekshi. Qurmetti ustazdar, oqýshylar, ata-analar sizderdi bilimniń alǵashqy kúnimen shyn júrekten quttyqtaýǵa ruqsat etińizder. Sizderdiń shákirtterińiz úmitterińizdi aqtap, osy bilim oshaǵynan el tizginin ustar eldiń azamattary bolyp shyǵýyna shyn júrekten tilektespin» dedi Oqý-aǵartý mınıstri Ǵanı Beısembaev.
Memleketimiz bilim salasyna únemi qoldaý kórsetip otyrady. Sonyń aıqyn aıǵaǵy – «Jaıly mektep» ulttyq jobasy sheńberinde elimizde buryn-sońdy bolmaǵan jańalyq – 400 jańa úlgidegi mektepter soǵylmaqshy. Onyń 200-den astamynyń qurylysy qazirdiń ózinde júrgizilip jatyr. Munyń bári memleketimizdegi apatty jáne úsh aýysymdyq mektepterdiń máselesin sheshýge baǵyttalǵan.
«Vernyı Kapıtal» ınvestısıalyq tobynyń bas dırektory Erlan Ospanov Qosshy qalasynyń ákimi Gaıdar Qasenovke jańa ǵımarattyń sımvolıkalyq kiltin tabys etti. Jalpy aýmaǵy 17,5 myń sharshy metr bolatyn jeke ınvestısıaǵa salynǵan mekteptiń merdigeri – "Bazis Construction". Onyń smetalyq quny -7,6 mlrd. teńge. Mektep tolyq jabdyqtalǵan, oqý kabınetteri qajetti kompúterlik jabdyqtarmen qamtamasyz etilgen, 360 oryndyq ashana, 280 oryndyq akt zaly, 2 sport zaly, 4 ınformatıka kabıneti, mýzykalyq aspaptar kabıneti, býfet, kitaphana, 3 kitap qoımasy, sondaı-aq gımnazıada (qysh sheberhanasy, robottehnıka, fotostýdıa kabınet sıaqty) arnaıy kabınetter bar. Budan bólek hımıa, fızıka, bıologıa, tehnologıa kabınetteri barlyq qajetti jabdyqtarmen tolyq qamtylǵan. Oqý kabınetteri sanıtarlyq talaptarǵa sáıkes mektep jıhazdarymen jabdyqtalǵan. Mektep aýmaǵynda fýtbol jáne basketbol alańy bar.
Ǵımarat 3 (úsh) qabatty, jedelsaty júıesi jumys isteıdi. Jalpy oqýshylar sany – 2 657.
Gımnazıaǵa kire beriste týrnıketter ornatylǵan, ol mektepke kirý bet determınanty (FaseID) arqyly júzege asyrylady. Mektep oqýshylary men qyzmetkerleriniń derekter bazasy qurylǵan. Mektep joǵary sapaly, zamanaýı tehnologıalyq jabdyqtarmen jabdyqtalǵan!
Sondaı-aq búgin Qosshy qalasynda 1200 oryndyq №3 taǵy bir mektep ashyldy. Onyń qurylysyna Aqmola oblysynyń búdjetinen 220 mlrd. teńge bólingen. Mekteptiń jalpy aýdany - 20357 myń sharshy metr. Ǵımarat 3 qabattan, 6 bloktan turady. Oqý kabınetteriniń sany-50. Hımıa, fızıka, bıologıa, tehnologıa kabınetteri, qajetti jıhazben tolyqtaı jabdyqtalǵan. 384 oryndyq ashana, 600 oryndyq akt zaly, aýdany 520 sharshy metr sport zaly, metal, aǵash, mata óńdeý sheberhanalary, alǵashqy áskerı daıyndyq kabıneti bar.
Mektep aýmaǵynda fýtbol jáne basketbol alańy bar. Barlyq qabyldanǵan oqýshylar sany-590 oqýshy. Oqýshylar sany taǵy kóbeıedi dep kútilýde.
Sóıtip, 2023-2024 oqý jylynyń basynda mektepke Qosshy qalasy boıynsha 10 809 oqýshy bardy. Birinshi synyp oqýshylarynyń sany –1321, onyń ishinde jeke mektepte – 77, Taıtóbedegi mektepte – 71.
Qalanyń bilim berý uıymynyń jelisine 31 balabaqsha kiredi. Onda 3 667 bala tárbıelenip jatyr. 420 oryndyq 2 memlekettik balabaqsha («Altyn dán» jáne «Sulý-aı») jáne 3 263 balaǵa arnalǵan 29 jeke balabaqsha bar. Qazirgi ýaqytta balabaqsha kezeginde barlyǵy 1 456 bala tur.
2024 jyly Abaı Qunanbaev kóshesinde jobalyq qýaty 1200 oryndyq mektepti iske qosý josparlanýda, sonymen qatar 2024 jyly Qosshy qalasy men Taıtóbe aýylynda «Jaıly mektep» baǵdarlamasy boıynsha 3 birdeı bilim oshaǵanyń irgetasy qalanyp bastalady. Bul mektepterdi 2025 jyly paıdalanýǵa berý josparlanýda.
