– Qazaqstan soltústik pen ońtústikti, batys pen shyǵysty bailanystyratyn jahandyq jolairyqta ornalasqan. Bul bizdiń elimizge zor múmkindik berip otyr. Sondyqtan kólik-logistika salasy ekonomikamyzdy alǵa bastaityn basty kúshtiń birine ainalýǵa tiis. Qazir báseke kúsheiip tur. Osyǵan orai birqatar mańyzdy máseleni shuǵyl sheshý kerek.
Eń aldymen, «Dostyq-Moiynty», «Baqty-Aiakóz», «Darbaza-Maqtaaral» baǵytyndaǵy iri temirjol jobalaryn sapaly júzege asyrý qajet. Onyń qatarynda Almatyny ainalyp ótetin temir jol jelisi de bar. Qazaqstan kólik salasynda Reseimen, Qytaimen yntymaqtastyǵyn jalǵastyra beredi, – dedi Prezident.
Budan basqa Qasym-Jomart Toqaev óziniń Qazaqstan halyqyna arnaǵan Joldaýynda teńiz infraqurylymyn damytýdyń mańyzyna toqtaldy.
– Bizge teńiz infraqurylymyn damytýǵa arnalǵan birtutas jospar kerek. Onda Quryq portyna airyqsha mán berilýge tiis. Quryqty Aqtaý porty siiaqty tolyqqandy logistikalyq klasterge ainaldyrýymyz qajet. «Soltústik-Ońtústik» halyqaralyq dálizi de óte mańyzdy. Sol arqyly Parsy shyǵanaǵyna shyǵýǵa bolady. Birtindep bul baǵyttaǵy temirjol jelisiniń ótkizý múmkindigin eki ese arttyrý kerek.
Aldymen «Bolashaq-Cheliabinsk» temirjol jelisiniń Qazaqstandaǵy bóligin jańǵyrtýǵa kirisý qajet. Halyqaralyq dálizdermen tiimdi bailanys ornatý úshin logistika qyzmetin tolyq usyný mańyzdy. Astana, Almaty, Shymkent jáne Aqtóbe áýejailary mýltimodaldy ortalyq bolýǵa tiis.
Bul ortalyqtar básekege qabiletti bolý úshin júkterdi qabyldaý jáne taratý qyzmeti sapaly atqarylýy kerek. Jalpy, salany damytý úshin tarif jáne retteý saiasaty durys júrgizilýge tiis. Jeke investitsiiany kóptep tartý kerek, – dep Prezident oiyn ortaǵa saldy.
Sonymen qatar Memleket basshysy «Qazaqstan temir jolyn» tolyqqandy kólik-logistika kompaniiasy etip qaita qurý kerek ekenin alǵa tartty. Budan basqa Prezident avtokólik joldarynyń qurylysy máselesi sheshimin tabýǵa tiis ekenin aita kele, qazir joldardyń sapasy syn kótermeitinin aitty. Buǵan salada beleń alǵan jemqorlyq pen básekeniń joqtyń aiaqqa tusaý salyp turǵanyn jasyrmai aitty.
– Jyl sońyna deiin naqty sharalar qabyldaý qajet. Mindetin adal atqarmaǵan barlyq kompaniia zań boiynsha jaýapqa tartylady. Bul máselege men basa nazar aýdaramyn. Baqylaýdy kúsheitip, jańa normativtik qujattar qabyldaý kerek. 2029 jylǵa deiin 4 myń shaqyrymnan astam jolǵa kúrdeli jóndeý júrgizý qajet, – dedi Prezident.
– Jalpy alǵanda, Qazaqstan Eýraziia qurlyǵyndaǵy basty tranzit haby retindegi rólin arttyrýy kerek. Osylaisha, ýaqyt óte kele kólik-logistika salasyndaǵy iri memleketke ainalýymyz qajet.
Kólik-logistika salasyn qarqyndy damytý – bul strategiialyq mindet. Úsh jyl ishinde onyń ishki jalpy ónimdegi úlesi keminde 9 paiyzǵa jetýge tiis. Ol úshin salany tiimdi basqarý óte mańyzdy. Sondyqtan Kólik ministrligin qaita qurǵan jón. Bul ministrlik jol infraqurylymyn salýmen de ainalysady, – dedi Memleket basshysy.
