Жолдау: Жемқорлық пен бәсекенің жоқтың жол құрылысын тұсап тұр!

Dalanews 01 қыр. 2023 06:31 291

Дүниежүзіндегі соңғы геосаяси жағдайлардан кейін көлік-логистика саласы үлкен өзгеріске түсіп жатқаны белгілі. Президент Жолдауында бұл мәселе баса мән берілді. Мемлекет басшысы Қазақстан солтүстік пен оңтүстікті, батыс пен шығысты байланыстыратын жаһандық жолайрықта орналасқан мүмкіндігін барынша пайдалануы керек екенін алға тартты, – деп хабарлайды Dalanews.kz.  

– Қазақстан солтүстік пен оңтүстікті, батыс пен шығысты байланыстыратын жаһандық жолайрықта орналасқан. Бұл біздің елімізге зор мүмкіндік беріп отыр. Сондықтан көлік-логистика саласы экономикамызды алға бастайтын басты күштің біріне айналуға тиіс. Қазір бәсеке күшейіп тұр. Осыған орай бірқатар маңызды мәселені шұғыл шешу керек.

Ең алдымен, «Достық-Мойынты», «Бақты-Аякөз», «Дарбаза-Мақтаарал» бағытындағы ірі теміржол жобаларын сапалы жүзеге асыру қажет. Оның қатарында Алматыны айналып өтетін темір жол желісі де бар. Қазақстан көлік саласында Ресеймен, Қытаймен ынтымақтастығын жалғастыра береді, – деді Президент.

Бұдан басқа Қасым-Жомарт Тоқаев өзінің Қазақстан халықына арнаған Жолдауында теңіз инфрақұрылымын дамытудың маңызына тоқталды.

– Бізге теңіз инфрақұрылымын дамытуға арналған біртұтас жоспар керек. Онда Құрық портына айрықша мән берілуге тиіс. Құрықты Ақтау порты сияқты толыққанды логистикалық кластерге айналдыруымыз қажет. «Солтүстік-Оңтүстік» халықаралық дәлізі де өте маңызды. Сол арқылы Парсы шығанағына шығуға болады. Біртіндеп бұл бағыттағы теміржол желісінің өткізу мүмкіндігін екі есе арттыру керек.


Алдымен «Болашақ-Челябинск» теміржол желісінің Қазақстандағы бөлігін жаңғыртуға кірісу қажет. Халықаралық дәліздермен тиімді байланыс орнату үшін логистика қызметін толық ұсыну маңызды. Астана, Алматы, Шымкент және Ақтөбе әуежайлары мультимодальды орталық болуға тиіс.

Бұл орталықтар бәсекеге қабілетті болу үшін жүктерді қабылдау және тарату қызметі сапалы атқарылуы керек. Жалпы, саланы дамыту үшін тариф және реттеу саясаты дұрыс жүргізілуге тиіс. Жеке инвестицияны көптеп тарту керек, – деп Президент ойын ортаға салды.

Сонымен қатар Мемлекет басшысы «Қазақстан темір жолын» толыққанды көлік-логистика компаниясы етіп қайта құру керек екенін алға тартты. Бұдан басқа Президент автокөлік жолдарының құрылысы мәселесі шешімін табуға тиіс екенін айта келе, қазір жолдардың сапасы сын көтермейтінін айтты. Бұған салада белең алған жемқорлық пен бәсекенің жоқтың аяққа тұсау салып тұрғанын жасырмай айтты.

– Жыл соңына дейін нақты шаралар қабылдау қажет. Міндетін адал атқармаған барлық компания заң бойынша жауапқа тартылады. Бұл мәселеге мен баса назар аударамын. Бақылауды күшейтіп, жаңа нормативтік құжаттар қабылдау керек. 2029 жылға дейін 4 мың шақырымнан астам жолға күрделі жөндеу жүргізу қажет, – деді Президент.


– Жалпы алғанда, Қазақстан Еуразия құрлығындағы басты транзит хабы ретіндегі рөлін арттыруы керек. Осылайша, уақыт өте келе көлік-логистика саласындағы ірі мемлекетке айналуымыз қажет.

Көлік-логистика саласын қарқынды дамыту – бұл стратегиялық міндет. Үш жыл ішінде оның ішкі жалпы өнімдегі үлесі кемінде 9 пайызға жетуге тиіс. Ол үшін саланы тиімді басқару өте маңызды. Сондықтан Көлік министрлігін қайта құрған жөн. Бұл министрлік жол инфрақұрылымын салумен де айналысады, – деді Мемлекет басшысы.

 

Ұсынылған
Соңғы жаңалықтар