– Lılıa hanym, qazirgi tańda elimiz boıynsha qansha qosymsha bilim berý uıymdary bar? Qazirgi pandemıa kezinde olardyń jumysyn qalaı baǵalaısyz? Áńgimemizdi osydan bastasaq.
– Qosymsha bilim berý júıesi jalpy bilim berý júıesiniń ajyramas bir bólshegi bolyp tabylady. Sondyqtan bilimdi urpaq daıyndaýda qosymsha bilim berý uıymdarynyń mańyzy zor.
Endi suraǵyńyzǵa jaýap bersem. Qazirgi tańda elimizde 1259 balaǵa qosymsha bilim berý uıymdary jumys isteıdi. Onyń 806-sy taza bilim berý salasymen baılanysty bolsa, 453-i sport pen mádenıet salasy boıynsha qyzmet atqarady. Qazirgi tańda osy qosymsha bilim berý uıymdarynda mıllıonnan astam bala bilimin jetildirýde.
Bıyl jer álemdi sharpyǵan pandemıa da bizdiń jumysymyzǵa óz salqynyn tıgizdi. Elimizde karantın jarıalanǵan kúnnen bastap bizder qosymsha bilim berý uıymdarynda jumys isteıtin pedagogtary oqý úrdisine ádistemelik usynymdar engizdik. Osy rette Memlekettik sanıtarlyq baqylaý mekemesi 15 balaǵa deıingi shaǵyn toptarda jumys isteýge ruqsat berdi. Osylaısha, qazirgi tańda barlyq sanıtarlyq talaptardy saqtap, jumysymyzdy jalǵastyryp jatyrmyz. Ár aımaqtyń pandemıa kezinde jumysty uıymdastyrýǵa qatysty ózindik josparlary daıyndalyp bekitken. Sol jumys josparynyń aıasynan bir eli de aýytqymaı, jumys istep jatqan jaıymyz bar. Sabaq kesteleriniń bári ata-analarmen kelisilgen.
– Sonda qosymsha bilim berý uıymdary balalar úshin onlaın sabaqtar ótkizbeı me?
– Joq. Onlaın rejımde sabaqtar júrip jatyr. Áńgime arasynda elimizde mádenıet pen sport salasy boıynsha da qosymsha bilim berý uıymdary jumys isteıtinin aıttyq. Máselen, mýzyka úıirmelerinde keıbir jetkinshekter qandaı da bir aspap boıynsha ustazdarynan jeke jaǵdaıda tálim alady. Al toptyq jaǵdaıda (15 adamǵa deıin) mýzyka tarıhy syndy teorıalyq sabaqtardy balalar birge oqıdy. Sabaq barysynda barlyq sanıtarlyqtar saqtalýy mańyzdy.
Óner men mádenıet, sport salasy boıynsha balalardy toptyq oqytý rejımi 1 qyrkúıekten bastap qolǵa alynǵan. Al elimiz boıynsha qosymsha bilim berý uıymdary 66 myń balaǵa qashyqtan bilim berýde. Ata-analardyń ótinishi boıynsha 40 myń bala toptyq rejımde bilim alsa, 30 myńǵa jýyq bala jeke oqytylyp jatqanyn aıta ketýimiz kerek.
Al 15 qyrkúıekten bastap elimizdegi oqýshylar saraıy, aýla klýbtary, jas natýralıser, tehnıkter stansalary 500 myńnan balaǵa qashyqtan bilim berýde. Osy rette pandemıaǵa baılanysty bıylǵy oqý jylynda kóptegen is-sharalardy onlaın formatta ótkizýge májbúr bolyp otyrmyz.
– Qosymsha bilim uıymdary balalarǵa túrli baǵytta bilim beretini belgili. Sol baǵyttardy tarqatyp aıtsańyz?
– Qazirgi tańda elimiz boıynsha qosymsha bilim berý uıymdary mýzyka, kórkem-estetıka, ǵylymı-tehnıkalyq ekologıa, bıologıa, týrısik ólketaný jáne áleýmettik pedagogıkalyq baǵyt boıynsha jastardyń bilimin jetildiredi.
– Ózińiz atap ótken baǵyttar boıynsha qandaı is-sharalardy qashyqtan uıymdastyryp jatyrsyzdar?
– Qosymsha bilim berý júıesinde baǵyttar boıynsha is-sharalardy uıymdastyrýdyń mańyzy zor. İs-sharalar men túrli olımpıadalar arqyly bizder balalardyń bilim deńgeıin anyqtap, pedagogtardyń jumysyn baǵalaýǵa bolady. Sondyqtan bizder qyrkúıektiń bel ortasynan bastap josparlaǵan is-sharalarymyzdy onlaın-formatta uıymdastyrýdy bastap kettik.
Aıtalyq, qazirgi tańda ǵylymı-tehnıkalyq baǵytta avıa jáne avto modeldeý, robotqurastyrý, mamandyq tańdaý jáne mýzyka boıynsha jyl saıyn uıymdastyratyn baıqaýymyz bıyl onlaın-formatta 53-ret uıymdastyryldy. Budan basqa, «Tabıǵatty aıala» dep atalatyn respýblıkalyq forýmymyz joǵary deńgeıde ótip, jas ekologtarymyz atalmysh is-sharaǵa belsene qatysty. Qoldanbaly óner baǵyty boıynsha «Altyn qazyna» dep atalatyn baıqaýymyz da joǵary deńgeıde ótti.
– Áńgimeńizge raqmet!
Aınur JUMAHAN.
