Memleket basshysy Qasym-Jomart Toqaev 2019 jyly Prezident bolyp sailanǵannan keiin EýroOdaq elderindegi alǵashqy jumys saparyn Germaniiadan bastaǵany tegin emes. Sol kezde Prezidentimiz eki el arasyndaǵy ekonomikalyq bailanysty nyǵaityp, nemis komaniialarynyń energetika jáne ekologiialyq máselelerdi damytýǵa ýaǵdalasqan bolatyn.
Vitse-premer Roman Skliardyń nemis kompaniialarymen onlaiyn kezdesý ótkizip, qorshaǵan ortany qorǵaý, sý resýrstary salasyndaǵy ekijaqty ekonomikalyq jobalardy sóz etýine sol kezdegi kezdesýde qol jetkizgen ýaǵdalastyqtar negiz bolǵanyn aita ketýimiz kerek.
Onlain kezdesýge Germaniia ekonomikasynyń Shyǵys komitetiniń tóraǵasy Oliver Germes men GFR-diń Syrtqy ister ministrliginiń Memlekettik hatshysy Berger Migel qatysyp, nemis kásiporyndarynyń qorshaǵan ortany qorǵaý salasyndaǵy jetistikterin sóz etti. Osy rette onlain kezdesýdi nemistiń áigili Siemens, BASF, Henkel, WILO SE, LLP C, Spaarmann, Becker Mining Europe GmbH, Svevind Energy GmbH, Robert Bosch syndy 100-ge jýyq kompaniialarynyń ókilderi baqylap, Qazaqstanmen aradaǵy ekonomikalyq bailanysty nyǵaitýǵa qyzyǵýshylyq tanytty.
Óz kezeginde QR Úkimeti Tóraǵasynyń orynbasary Roman Skliar ónerkásiptik óndiris, mashina jasaý, energetika, jańartylatyn energiia kózderi salalardaǵy birlesken jobalardy iske asyrý máselelerindegi tabysty yntymaqtastyqty, ornaǵanyn alǵa tartty.
Qazirgi tańda Germania óziniń mashinaqurastyrý salasyndaǵy jetistikterimen álem elderiniń nazaryn aýdarýda. Osy rette Germaniia Qazaqstannyń shikizattyq emes sektoryna investitsiia salyp otyrǵan kósbasshy el ekenin de aita ketkenimiz jón. Sol sebepti Qazaqstan árqashan Germaniiamen aradaǵy saiasi-ekonomikalyq bailanysty nyǵaitý isine basa mán berip keledi.
Búginde elimizde nemis kapitalynyń qatysýymen irili-usaqty 200-ge jýyq kompaniia jumys isteidi. Bul komapniialar el ekonomikasynyń damýyna ólsheýsiz úles qosqany belgili. Vitse-premer Roman Skliar aldaǵy ýaqytta eki el arasynda ekonomikalyq yntamaqtastyqty odan ary keńeitip, joǵary deńgeige kóterýge Qazaqstan Úkimeti múddeli ekenin jetkizdi.
Dúniejúzindegi tórtinshi ekonomika sanalatan Germaniianyń qazir Qazaqstanǵa investitsiia salǵan elderdiń tizbeginde 12 orynǵa taban tirep tur. Árine, qýatty ekonomikaǵa ie eldiń tabiǵi resýrsqa bai Qazaqstanǵa budan da kóp investitsiia salatyn múmkindigi bar. Aldaǵy ýaqytta Qazaqstan Úkimeti osy baǵytta jumys istep, eki el arasyndaǵy saýda-ekonomikalyq bailanystardy nyǵaitýdy kózdep otyr.
– Pandemiia eki el arasyndaǵy ekonomikalyq yntymaqtastyqqa birshama salqynyn tigizgeni jasyryn emes. Aitalyq, munai-gaz salasyndaǵy eksporty birshama azaidy. Biraq bul olqylyqtyń ornyn toltyrýǵa bolady. Búgin bizder eki el arasyndaǵy bailanysty qaita jandandyrý úshin júzdesip otyrmyz. Aldaǵy ýaqytta nemis kompaniialary Qazaqstan ekonomikasyna investitsiia salýǵa shaqyramyn. Qazirgi tańda Qazaqstanda shetel investitsiiasyn qorǵaý jáne investorlardy memlekettik turǵydan qoldaý isine joǵary deńgeide kóńil bólinedi, – dedi Roman Skliar myrza.
Qazaqstan men Germaniianyń arasyndaǵy ekonomikalyq bailanysqa elimiz táýelsizdikke ie bolǵan kezeńnen beri toqtaýsyz damyp kele jatqany belgili. Eki el arasyndaǵy saýda-ekonomikalyq bailanystyń órkendeýine Berlin Eýraziialyq klýby da yqpal etip otyrǵanyn aitýǵa tiispiz.
Sońǵy 15 jylda Germaniianyń jetekshi kásiporyndary Qazaqstan ekonomikasyna 4,2 mlrd eýro investitsiia salǵan. Bul rette Germaniianyń Ortalyq Aziia elderine salǵan investitsiianyń 85 paiyzy Qazaqstan naryǵyna baǵyttalǵanyn eskersek, eki eldi arasyndaǵy ekonomikalyq yntamqatastyqtyń tamyry tym tereńge ketkenin baiqaýǵa bolady.
Kezdesý sońynda Roman Skliar nemis kompaniialary klimattyń ózgerýine qarsy kúres, qaldyqtardy joiý, Aral teńiziniń qurǵaýyna bailanysty ekologiialyq apatpen kúresý, sondai-aq aýyz sýmen qamtamasyz etý sekildi salalarda yntymaqtastyq ornatýǵa shaqyrydy. Aldaǵy ýaqytta taraptar bul baǵytta da jumys istep, el ekonomikasyn órkendetýge múddeli.
Qýanysh SMAǴÚL
