Qonaev qalasynda jaǵajaılardy jańartý jumystary bastalyp, keıbir kásipkerlerdiń nysandary súrilip jatyr, dep habarlaıdy Dala News.

Bul týraly qala ákimdiginiń TÚKSH bóliminiń basshysy Tımýr Aqmyrzaev málimdedi.

Onyń aıtýynsha, №6 jáne №7 jaǵajaılar shomylý maýsymyna deıin tolyq jańartylyp, jańa ınfraqurylymmen jabdyqtalady. Joba aıasynda vızıt-ortalyq, 50-den astam bıznes nysany, 53 kıim aýystyrý orny jáne 21 ájethana ornatylady. Sonymen qatar balalar oıyn alańdary, vorkaýt aımaqtary jáne jaǵajaı sportyna arnalǵan oryndar salynady.

«Barlyq nysandar biryńǵaı dızaınmen jasalady. Qaýipsizdik pen kógaldandyrýǵa da erekshe kóńil bólinedi», – dedi Aqmyrzaev.

Jaǵajaıǵa jaıaý kirý tegin, tek avtoturaq úshin aqy alynady. Al bıznes oryndary senimgerlik basqarý arqyly kásipkerlerge jalǵa beriledi.

Qazirgi tańda jaǵajaıda burynnan jumys istep kelgen 40 kásipkerdiń nysandary buzylyp jatyr. Olardyń ishinde zań talaptaryn tolyq oryndaǵan 25 kásipkermen 5 jylǵa kelisimshart jasalǵan, al qalǵandary talaptardy oryndaǵan jaǵdaıda ǵana qaıta kelisimge otyra alady.

Ákimdik málimetinshe, jaǵajaılardy jańartý jumystary turǵyndardyń antısanıtarıaǵa qatysty jıi shaǵymdaryna baılanysty qolǵa alynǵan.

Sondaı-aq soltústik baǵyttaǵy jaǵajaı da abattandyrylyp, aldaǵy ýaqytta qaladaǵy barlyq komýnaldyq jaǵalaýlar kezeń-kezeńimen jańartylmaq.