Dáýren Abaev: Jańa Konstitýtsiia orys tiliniń mártebesin saqtaidy
Qazaqstannyń Reseidegi elshisi Dáýren Abaev referendýmda qabyldanǵan jańa Konstitýtsiia elde orys tili men orystildi azamattardyń quqyqtaryn qorǵaý baǵyty jalǵasatynyn málimdedi. Sondai-aq ol Qazaqstannyń Resei úshin senimdi ári turaqty seriktes bolyp qala beretinin atap ótti, dep habarlaidy Dalanews.kz.
Abaevtyń sózinshe, Konstitýtsiia mátininiń qazaq jáne orys tilderinde birdei zańdy kúshpen jariialanýy – memleket tarapynan orys tili men orystildi halyqty qorǵaýǵa degen ustanymnyń naqty dáleli.
"Qazaqstan halyqaralyq arenada Reseidiń senimdi ári boljamdy seriktesi bolyp qala beredi. Elimizde orys tiliniń joǵary mártebesi saqtalady. Prezident Qasym-Jomart Toqaev atap ótkendei, Konstitýtsiianyń qazaq jáne orys tilderinde teń zańdy kúshke ie bolýy – memleketimizdiń osy baǵyttaǵy dáiekti saiasatyn kórsetedi", - dedi elshi.
Ol sondai-aq jańartylǵan Konstitýtsiia adam quqyqtaryn qorǵaýǵa basymdyq beretinin jáne eldiń uzaq merzimdi damýyna negiz qalaitynyn aitty.
Budan bólek, Abaev referendýmdy baqylaýǵa qatysqan Resei tarapyna alǵys bildirdi.
Aita keteiik, jańa Konstitýtsiiany qabyldaý jónindegi referendým Qazaqstanda 15 naýryzda ótti. Onyń resmi qorytyndylary 17 naýryzda jariialandy.
