Naýryz meiramy aiasynda elimizde buryn-sońdy bolmaǵan aýqymdy mádeni shara ótti. Qalalyq Bilim basqarmasynyń uiymdastyrýymen ótken «Dombyra úni» aktsiiasynda 11 500 jas dombyrashy bir mezette kúi oryndap, Qazaqstan rekordtar kitabyna jańa jetistik engizdi, dep habarlaidy Dalanews.kz.
Aýqymdy sharaǵa qalanyń 6–10 synyp oqýshylary qatysyp, ulttyq aspaptyń únin bir arnaǵa toǵystyrdy. Uiymdastyrýshylardyń aitýynsha, aktsiianyń basty maqsaty – qazaqtyń dástúrli mýzykasyn dáripteý, jas urpaqtyń ulttyq ónerge degen qyzyǵýshylyǵyn arttyrý jáne mádeni murany keńinen nasihattaý.
Bir sahnada bas qosqan myńdaǵan jas ónerpaz qazaq halqynyń bai rýhani murasyna degen qurmetin kórsetti. Nátijesinde bul is-shara ulttyq aspapta kúidi bir ýaqytta eń kóp adam oryndaǵan mádeni oqiǵa retinde resmi túrde Qazaqstan rekordtar kitabyna endi.
Mýzykalyq fleshmob Naýryz meiramynyń eń jarqyn sátteriniń birine ainalyp, kórermenderge erekshe áser syilady. Uiymdastyrýshylardyń pikirinshe, bul tek kontsert emes, myńdaǵan jas júrektiń bir yrǵaqta soǵýy men ata-baba murasyna degen qurmettiń aiqyn kórinisi.
Aita keteiik, ótken jyly Taldyqorǵan qalasynda Ulttyq dombyra kúnine orai 5 myńǵa jýyq adam qatysqan chellendj uiymdastyrylyp, rekord tirkelgen bolatyn. Búgingi shara bul rekordty jańartty.
