Aqtóbe oblysynda ınternet arqyly esirtki taratýmen aınalysqan uıymdasqan qylmystyq topqa úkim shyqty, dep habarlaıdy Dala News.

Prokýratýra málimetinshe, 6 kúdikti kináli dep tanylyp, olarǵa 15 jyldan 17 jylǵa deıin bas bostandyǵynan aıyrý jazasy taǵaıyndalǵan.

Tergeý barysynda qylmystyq toptyń Telegram messendjeri arqyly «baılanyssyz» tásilmen esirtki satqany anyqtalǵan. Tólemder arnaıy «dropperlerdiń» bank kartalary arqyly júrgizilgen.

Kúdiktiler Aqtóbe, Qaraǵandy, Soltústik Qazaqstan, Aqmola oblystary men Astana qalasynda ustalǵan.

Operasıa barysynda zańsyz aınalymnan 10 keliden astam psıhotroptyq zat tárkilengen. Sonymen qatar «Qymyz shop» ınternet-dúkeniniń qyzmeti tolyq toqtatyldy.

Prokýratýranyń málimetinshe, óńirde jyl basynan beri esirtki qylmysyna qarsy jumystar kúsheıtilgen. Atap aıtqanda:
— 20-dan astam narkomagazın jarnamasy joıylǵan;
— 500-den astam profılaktıkalyq is-shara ótkizilip, 13 myńnan astam adam qamtylǵan;
— 2 myńǵa jýyq bank shoty men 34 myń sheteldik karta buǵattalǵan (65,5 mln teńge);
— esirtkige qatysty 260 Telegram-arna men ınternet-resýrsqa qoljetimdilik shektelgen.

Quzyrly organdar mundaı qylmystarǵa qarsy kúres jalǵasatynyn málimdedi.