Qazaqstanda meditsinalyq kómektiń sapasyn baqylaý júiesi tolyq jańǵyrtylyp, jasandy intellekt engiziledi, dep habarlaidy Dala News.
2026–2030 jyldarǵa arnalǵan keshendi josparǵa sáikes, eldegi meditsinalyq uiymdardyń 70%-y postlitsenziialyq monitoringpen qamtylady, al keminde 80%-y jańa standarttar boiynsha akkreditatsiiadan ótedi.
Qujat meditsinalyq qyzmet sapasyn basqarýdyń zamanaýi modeline kóshýge baǵyttalǵan. Júie derekterge, tsifrlyq tehnologiialarǵa jáne jasandy intellekt quraldaryna negizdelmek.
Josparda tórt negizgi baǵyt belgilengen:
— meditsinalyq qyzmet kórsetý salasyndaǵy retteý tetikterin jańartý;
— jasandy intellekt qoldanylatyn jańa sapa saraptamasy modelin engizý;
— meditsinalyq qaýymdastyq pen patsientterdiń rólin kúsheitý;
— sapany basqarý júiesin tolyq tsifrlandyrý.
Negizgi maqsat – patsientti meditsinalyq qyzmet sapasyn baǵalaý men baqylaýdyń belsendi qatysýshysyna ainaldyrý.
Sonymen qatar, 2028 jyldan bastap meditsinalyq qyzmet kórsetýshiler úshin mindetti akkreditatsiia engiziledi, al sapany baqylaý júiesi tolyq tsifrlyq formatqa kóshiriledi.
Jospar aiasynda Ulttyq ǵylymi densaýlyq saqtaý ortalyǵy bazasynda Ulttyq sapa institýty qurylmaq. Ol saladaǵy ádistemelik jáne analitikalyq ortalyqqa ainalady.
2027 jyldan bastap sapany baǵalaýdyń úsh komponentti modeli engiziledi, al 2028 jylǵa qarai baqylaýdyń keminde 20%-y jasandy intellekt arqyly júrgiziledi.
Bilik bul ózgerister meditsinalyq qyzmetterdiń sapasyn arttyryp, júieniń ashyqtyǵyn qamtamasyz etedi dep otyr.
