قازاقستاندا مەديسينالىق كومەكتىڭ ساپاسىن باقىلاۋ جۇيەسى تولىق جاڭعىرتىلىپ، جاساندى ينتەللەكت ەنگىزىلەدى، دەپ حابارلايدى Dala News.

2026–2030 جىلدارعا ارنالعان كەشەندى جوسپارعا سايكەس، ەلدەگى مەديسينالىق ۇيىمداردىڭ 70%-ى پوستليسەنزيالىق مونيتورينگپەن قامتىلادى، ال كەمىندە 80%-ى جاڭا ستاندارتتار بويىنشا اككرەديتاسيادان وتەدى.

قۇجات مەديسينالىق قىزمەت ساپاسىن باسقارۋدىڭ زاماناۋي مودەلىنە كوشۋگە باعىتتالعان. جۇيە دەرەكتەرگە، سيفرلىق تەحنولوگيالارعا جانە جاساندى ينتەللەكت قۇرالدارىنا نەگىزدەلمەك.

جوسپاردا ءتورت نەگىزگى باعىت بەلگىلەنگەن:
— مەديسينالىق قىزمەت كورسەتۋ سالاسىنداعى رەتتەۋ تەتىكتەرىن جاڭارتۋ؛
— جاساندى ينتەللەكت قولدانىلاتىن جاڭا ساپا ساراپتاماسى مودەلىن ەنگىزۋ؛
— مەديسينالىق قاۋىمداستىق پەن پاسيەنتتەردىڭ ءرولىن كۇشەيتۋ؛
— ساپانى باسقارۋ جۇيەسىن تولىق سيفرلاندىرۋ.

نەگىزگى ماقسات – پاسيەنتتى مەديسينالىق قىزمەت ساپاسىن باعالاۋ مەن باقىلاۋدىڭ بەلسەندى قاتىسۋشىسىنا اينالدىرۋ.

سونىمەن قاتار، 2028 جىلدان باستاپ مەديسينالىق قىزمەت كورسەتۋشىلەر ءۇشىن مىندەتتى اككرەديتاسيا ەنگىزىلەدى، ال ساپانى باقىلاۋ جۇيەسى تولىق سيفرلىق فورماتقا كوشىرىلەدى.

جوسپار اياسىندا ۇلتتىق عىلىمي دەنساۋلىق ساقتاۋ ورتالىعى بازاسىندا ۇلتتىق ساپا ينستيتۋتى قۇرىلماق. ول سالاداعى ادىستەمەلىك جانە اناليتيكالىق ورتالىققا اينالادى.

2027 جىلدان باستاپ ساپانى باعالاۋدىڭ ءۇش كومپونەنتتى مودەلى ەنگىزىلەدى، ال 2028 جىلعا قاراي باقىلاۋدىڭ كەمىندە 20%-ى جاساندى ينتەللەكت ارقىلى جۇرگىزىلەدى.

بيلىك بۇل وزگەرىستەر مەديسينالىق قىزمەتتەردىڭ ساپاسىن ارتتىرىپ، جۇيەنىڭ اشىقتىعىن قامتاماسىز ەتەدى دەپ وتىر.