Qazaqstanda jańa Konstitýtsiia jobasyna qoǵamdyq qoldaý joǵary deńgeide qalyptasqan, dep habarlaidy Dala News.
Bul týraly QR Prezidenti janyndaǵy Qazaqstan strategiialyq zertteýler institýtynyń sarapshysy Ámina Úrpekova málimdedi. Onyń aitýynsha, áleýmettik zertteýler nátijesi boiynsha reformany qoldaý deńgeii shamamen 90% bolǵan.
Sarapshynyń sózinshe, bastapqyda qoǵam institýtsionaldyq ózgeristerge – bir palataly parlament, vitse-prezident qyzmeti jáne Halyq keńesin qurý siiaqty jańashyldyqtarǵa nazar aýdarǵan.
Alaida referendým jaqyndaǵan saiyn azamattardyń qyzyǵýshylyǵy áleýmettik máselelerge oiysqan. Atap aitqanda, halyqtyń nazary:
– áleýmettik kepildikterge,
– bilim men ǵylymǵa,
– qorshaǵan ortany qorǵaýǵa,
– tsifrlyq qaýipsizdikke baǵyttalǵan normalarǵa aýǵan.
«Azamattar kúndelikti ómirine tikelei áser etetin ózgeristerge kóbirek mán beredi», – dedi sarapshy.
Sonymen qatar saýalnamalarǵa sáikes, turǵyndardyń basym bóligi reformalar óz ómirine oń áser etedi dep kútedi. Al referendýmǵa qatysýǵa daiyndyq deńgeii 71–75% shamasynda bolǵan.
Sarapshylardyń pikirinshe, qoǵamdyq talqylaý men túsindirý jumystary halyqtyń belsendiligin arttyryp, Konstitýtsiia jobasyna joǵary qoldaý qalyptastyrýǵa yqpal etken.
