Atyraýda sot buryn para alǵany úshin sottalǵan Baqytgúl Hamenovaǵa qatysty jazany ózgertti, dep habarlaidy Dala News.
2026 jylǵy 16 naýryzda Atyraý qalasynyń №2 soty probatsiia qyzmetiniń usynysyn qarap, jazany óteýdi keiinge qaldyrý merzimi aiaqtalǵannan keiin sheshim qabyldady.
Sot málimetinshe, úsh jyldyq merzim ishinde Hamenova qoǵamdyq tártipti buzbaǵan, ákimshilik jaýapkershilikke tartylmaǵan jáne balasyn tárbieleý mindetterin oryndaǵan.
Osyny eskergen sot ótelmegen jaza bóligin 7 jyl merzimge bas bostandyǵyn shekteýge aýystyryp, sol merzimge probatsiialyq baqylaý belgiledi.
Eske salaiyq, 2022 jylǵy 15 qarashada sot Hamenovany QR QK 366-baby 3-bóligi 2-tarmaǵy boiynsha kináli dep tanyp, 7 jylǵa bas bostandyǵynan aiyrý jáne ómir boiy memlekettik qyzmette jumys isteý quqyǵynan aiyrý jazasyn taǵaiyndaǵan.
Alaida onyń kámeletke tolmaǵan balasynyń bolýyna bailanysty jaza óteý úsh jylǵa keiinge shegerilgen.
Is materialdaryna sáikes, áńgime Abai Qunanbaevqa eskertkish ornatý jobasy kezinde 4,5 mln teńge kóleminde para alý týraly bolǵan. Sondai-aq sot múlkin tárkileý týraly sheshim shyǵarǵan.
Hamenova kinásin moiyndamai, úkimge shaǵymdanǵanymen, sot sheshimi ózgerissiz qalǵan.
Buǵan deiin áleýmettik jelilerde onyń merekelik sharaǵa qatysqany týraly video taraǵan. Bas prokýratýra bul jaǵdaiǵa qatysty eshqandai zańbuzýshylyq bolmaǵanyn, is-sharaǵa qatysýǵa probatsiia qyzmetiniń ruqsaty berilgenin málimdegen.
