“Bul jazbalar Dini basqarmanyń bedeline nuqsan keltirý maqsatynda jazylǵany beseneden belgili. Negizsiz aiyptaýdyń sońy aiǵai-shýǵa ulasyp, isi musylman qaýymynyń arasynda arazdyq týǵyzdy.
Basqarmaǵa jala japqandar oilaǵan maqsatyna jetkendei. Olar el ishinde Islam dini, meshit týraly jańsaq pikir qalyptastyrýdy kózdegen edi.
Islam dininiń túp ózegin, onyń kanondary men qaǵidalaryn bile bermeitin, meshit jumysynyń tynys-tirshiliginen habarsyz keibir aǵaiyn Qasietti dinimizge kópe-kórneý til tigizip, ol týraly jalǵan, jańsaq sóilep, sol arqyly ózgelerdiń de kókeiine kúmán uialatyp jatqany jaiy bar.
Olar osy áreketi arqyly elimizdegi milliondaǵan adamnyń nanym-senimin qorlap, asyl dinimizge naqaqtan naqa kúie jaǵyp otyrǵanyn túsinse dep oilaisyń”, – deidi Baqdáýlet Nurmatuly.
Imam osy rette 2006 jyly Álemdik jáne dástúrli din sezinde din taqyrybynda jazatyn aqparat quraldaryna til qatqan Elbasynyń myna sózin mysalǵa keltirgen.
«Jýrnalister ózge din ókilderiniń sezimderimen sanaspai, namysyna tise, onda bul olardyń erte me, kesh pe óz nanym-senimderiniń qorlanýyna alyp keledi. Bireý úshin qasietti nárse basqa bireý úshin ázil nemese kelemejdiń nysany bolmaýy qajet. Bul qarapaiym erejeni, ókinishke qarai, aqparat quraldary men saiasatshylar jii-jii buzady», – degen edi sol joly Nazarbaev.
Imamnyń paiymdaýynsha, aqparattyq ǵasyrda oqyǵan dúnieni qorytpai qabyldaý qaýipti. Aqparatty aldymen oi súzgisinen ótkizgen jón. Dáieksiz, dálelsiz aqparatty álemjelide bólisip nemese jaqyn adamyńa joldaý adasýǵa aparatyn birden-bir jol.
“Jala jabylǵan adam týraly jaman oilaýdan aýlaq bolý qajet. Bul Islam dininiń negizgi ustyndarynyń biri. Bireýdiń syrtynan ton pishý, onyń jaǵymsyz obrazyn jasap, jurtqa jamandaý aýyr kúná.
Qasietti Quranda Aisha anaǵa jabylǵan jaladan keiin túsken aiatta: "Egerde ony estigen kezde: «Buny bizdiń aitýymyzǵa bolmaidy. Alla saqtasyn. Bul bir iri jala" degen bolsańdar edi" («Nur» súresi, 12-aiat), – delingen.
QMDB-ǵa qarǵys jaýdyrǵandar imamdardyń tanymyna, bilim deńgeiine kúmán keltiripti.
Elimizdegi din qyzmetkerleriniń derligi Túrkiia men Egipette bilim alǵan kózi ashyq, kókiregi oiaý mamandar. Álbette Dini basqarmaǵa bilimi kemel, tanymy tereń din qyzmetkerleri árýaqytta qajet.
Bul máselede Dini basqarma uzaqmerzimdi strategiialyq jospar ázirlegen jáne osy jospardyń negizinde biraz sharýa tyndyrylyp, kúrmeýli, túitkildi dúnieler kezeń-kezeńimen sheshimin tabýda. Ashýǵa boi aldyrmai, búlikshilerdiń aitaǵyna ermei, qolymyzdan kelgenshe saýapty iske sebepshi bolaiyq”, – deidi Baqdáýlet qajy Nurmatuly.
