QazUÝ rektory alty aida atqarylǵan jumystar jaiynda aityp berdi
Áńgime barysynda jetekshi ýniversitettiń sońǵy alty ai ishindegi qol jetkizgen jetistikteri, atqarylǵan sharýalar, jańa oqý jylyna daiyndyq, oqý ǵimarattary men jataqhanalarǵa júrgizilip jatqan keshendi jóndeý, stýdentter men oqytýshylarǵa jasalǵan jaǵdai, pandemiia kezindegi oqý protsesi jáne taǵy basqa máseleler talqylandy.
Elimizdiń jetekshi bilim ordasynda pandemiia men karantinge qaramastan, belsendi jumys jalǵasýda: oqý úderisi zamanaýi talaptarǵa sai jolǵa qoiylǵan, QazUÝ-dy zertteý ýniversitetine transformatsiialaý jumystary atqarylýda.
Sońǵy jarty jylda ýniversitettiń tynys-tirshiliginde aitarlyqtai oń ózgerister oryn aldy. Atap aitsaq, biylǵy jyly QazUÝ-ǵa memlekettik grant alýǵa úmitkerler sany 3 esedei ósti. Magistratýraǵa qabyldanǵandar sany – 1598 adam. Bul kórsetkish te ótken jylmen salystyrǵanda anaǵurlym artyq.
Jalpy, bilim ordasy biyl, sheteldik azamattar men doktorantýrany qospaǵanda, 6440 stýdentti oqýǵa qabyldady. «Altyn belgi» iegerleriniń sany da kóńil qýantarlyq, ótken jyly 508 úzdik mektep bitirýshi, biyl 737 ozat oqýshy QazUÝ stýdenti atandy.
Ýniversitet jańa oqý maýsymyna sheteldik seriktes ýniversitettermen birlesip bakalavriat, magistratýra jáne doktorantýra úshin 119 jańa bilim berý baǵdarlamasyn ázirledi. Jańa mamandyqtar qazaqstandyq stýdentter arasynda ǵana emes, sheteldik stýdentter ishinde de úlken suranysqa ie. QazUÝ-dyń shetelde filialdaryn ashý jumystary da júrgizilýde (Armeniia, Qyrǵyzstan, Ózbekstan, Túrkiia).
Búgingi sátte ýniversitettiń 16 jataqhanasynyń 14 -i jóndeýden ótti, jeti fakýltet ǵimaratyna kúrdeli jóndeý júrgizildi. Eki jataqhana qyrkúiek aiynyń sońynda paidalanylýǵa beriledi.
Ýniversitet basshylyǵy oqytýshylar men qyzmetkerlerdiń jalaqysyn kóterý máselesine erekshe nazar aýdarýda. Naýryz aiynda eńbekaqy 20 paiyzǵa ósti. Jańa oqý jylynda oqytýshy – 200 000 teńge, aǵa oqytýshy – 280 000 teńge, dotsent – 330 000 teńge, professor 500 000 teńge jalaqy alady. Sonymen qatar filosofiia doktory (PhD), ǵylym kandidaty, ǵylym doktory ǵylymi dárejesi, biliktilik deńgeii úshin qosymsha aqy tólenedi. Bonýstyq tólemder jylyna eki ret beriledi.
Qazirgi ýaqytta 2021-2025 jyldarǵa arnalǵan damýdyń negizgi basymdyqtary anyqtaldy. QazUÝ ujymy búkil el jáne álem boiynsha ýniversitettiń odan ári damýynyń strategiialyq mindetterin tiimdi júzege asyrýǵa yntaly.
Osy mezette QazUÝ-da 533 ǵylymi joba júzege asyrylýda. Ýniversitettiń tiimdi jumysynyń arqasynda biznesten jáne ártúrli halyqaralyq kózderden investitsiialar tartylady, sondai-aq serpindi zertteýler men tehnologiialardyń nátijeleri paidalanylady, ýniversitet ǵalymdarynyń jetistikterin álemdik deńgeide taldaý jumystary júrgiziledi.
Ýniversitet sanitarlyq-epidemiologiialyq qaýipsizdikti saqtap qana qoimai, oqý ǵimarattarynda, jataqhanalarda, kitaphanada, ýniversitet ǵimarattarynda ESQ qamtamasyz etý úshin barlyq sharalar qabyldady. Jańa oqý jylynan bastap kampýstaǵy barlyq oqý ǵimarattary men jataqhanalarǵa kirý úshin QR kodtary ornatylǵan «Ashyq» júiesi arqyly júzege asyrylatyn bolady.
Ál-Farabi atyndaǵy QazUÝ el Táýelsizdiginiń 30 jyldyǵyn merekeleýge arnalǵan negizgi is-sharalardy qamtyǵan jospardy bekitti. Olar «Otyz jyldyqqa – otyz aptalyq» jol kartasynda naqty kórsetilgen. Josparǵa sáikes, ýniversitette táýelsizdik tarihyna jáne Qazaqstan Respýblikasynyń Tuńǵysh Prezidenti – Elbasy Nursultan Nazarbaevtyń Qazaqstan tarihyndaǵy sińirgen eńbegine arnalǵan sharalar ótti. Kampýsta Elbasy saiabaǵy, Ǵalymdar baǵy, Aǵashtar alleiasy ashylyp, 1000-ǵa jýyq kóshet otyrǵyzyldy.
Ýniversitet rektory stýdent jastardyń sporttyq ómiri, oqytýshy-professorlar quramynyń áleýmettik jaǵdaiyn jaqsartý, jas mamandarǵa kóńil bólý josparlarymen bólisti.
