QazUÝ álemdegi ekologiialyq úzdik 200 JOO qataryna endi
Reiting joǵary oqý oryndarynda «jasyl» tehnologiialar men ekologiialyq saiasatty damytýdyń naqty kórinisin kórsetedi jáne olardy infraqurylymdy damytý, qaldyqtardy saqtaý jáne qaita óńdeý, sý men energiiany utymdy paidalaný, ekologiialyq taza kólikti paidalaný, ekologiia salasyndaǵy bilim berý jáne ǵylymi qyzmet, kampýstaǵy jasyl jelekter alańy siiaqty ólshemder boiynsha baǵalaidy. QazUÝ bul reitingte ózge qazaqstandyq joǵary oqý oryndarynan aitarlyqtai ozyp kele jatqanyn atap ótken jón.
BUU «Akademiialyq yqpal» baǵdarlamasynyń Jahandyq Habyn basqara otyryp, QazUÝ Prezident N.Nazarbaevtyń «Jasyl kópir» atty ǵalamdyq ideiasyn iske asyrý maqsatynda, «Jasyl kópir urpaqtan-urpaqqa» halyqaralyq seriktestik jobasyn usynyp jáne ony júzege asyrý úshin álem ýniversitetteriniń konsortsiýmyn qurdy. Turaqty damý jáne «Jasyl ekonomika» boiynsha mamandardy daiarlaý Kolýmbiia ýniversitetimen birlesip ashylǵan MDP «Global Classroom» ortalyǵymen tyǵyz yqpaldastyqta júzege asyrylady.
«QazUÝ - Green Campus» jobasy aiasynda ýniversitette ekologiialyq turaqty jáne jaily «jasyl» orta qurylýda. Mysaly, «jasyl tehnologiialar» ortalyǵy ashyldy. Ol «jasyl energetika» boiynsha energiia alýdyń túrli tehnologiialaryn: jel, kún, gidro jáne geotermaldy, biogaz jáne sýtegi energetikasyn qoldana otyryp, innovatsiialyq jobalardy iske asyrýǵa arnalǵan «Mini-EKSPO» bolyp tabylady. Munda zamanaýi tehnologiialar men ǵylymdy qajetsinetin injiniring negizinde mamandardy tájiribelik daiarlaý júrgizilýde.
Sondai-aq, gidroponikany qoldana otyryp gúlder, jemis-jidek, kókónis daqyldaryn ósirý úshin tiimdi energiialyq jylyjai jumys isteýde. Tazartý júiesin qoldaný arqyly «Kereńqulaq» ózeniniń arnasyn abattandyrýdyń jumystary aiaqtalýda. Ózendegi sý jasandy «Akvaponika» ekojúiesinde paidalanylatyn bolady. Bul jastardyń, ýniversitet kampýsy qonaqtary jáne de Almaty turǵyndarynyń erekshe demalys ornyna ainalyp qana qoimai, sándik ósimdikterdiń jáne qundy balyq túrlerin ósirýge arnalǵan stýdenttik tájiribelik baza bolmaq.
Jýyrda stýdentter úshin QazUÝ-da fontandar men demalýǵa arnalǵan kishi sáýlet orny bar, sondai-aq 50-den astam tropikalyq jáne sýbtropikalyq ósimdikter jinalǵan qysqy baq ashyldy. Munda bolashaq biologtar, geobotanikter men ekologtar ǵylymi tájiribe men taǵlymdamadan ótip, stýdentter men oqýshylar úshin arnaiy ekotreningter men ekskýrsiialar ótkiziledi. Al tabiǵat áýesqoilary ósimdikterge kútim jasaýǵa qatysa alady.
QazUÝ kóptegen halyqaralyq jobalardyń bastamashysy bola otyryp, jasyl tehnologiialardy engizý, ýniversitet qyzmetiniń energiia tiimdiligin arttyrýda ǵylym men tehnikanyń ozyq jetistikterin paidalaný boiynsha maqsatty jumystar júrgizýde.
