"Qazaqstan ekonomikasyna qandai reforma qajet". Týra osyndai taqyryppen Halyk Finance Basqarma tóraǵasynyń keńesshisi Murat Temirhanovnyń zertteý materialy jariialandy. Sarapshy óz materialynda keltirilgen ózekti máselelerdi ashyq talqylaityn ýaqyt jetkenin, ekonomikaǵa ózgeris engizý aýadai qajet ekenin aitady. Al onyń bári, ainalyp kelgende, saiasatta ózgerister jasaýdy talap etedi, dep habarlaidy Dalanews.kz.
Óz zertteýinde Murat Temirhanov el ekonomikasy úshin reformanyń eki negizgi baǵytyn usynady:
- EYDU elderindegi siiaqty tolyqqandy naryqtyq ekonomikany qurý
- Ekonomikanyń munai baǵasyna táýeldiligin azaitý jáne "resýrstyq qarǵysty" eńserý.
Onyń aitýynsha, EYDU elderiniń tájiribesine sáikes, tolyqqandy naryqtyq ekonomikany biliktiń tarmaqtarǵa naqty bólinýi, zańnyń ústemdigi, jeke menshik, jalpyǵa birdei sailaý quqyǵy, adam quqyǵy jáne saiasi erkindik syndy elementterdi qamtityn liberaldy demokratiiasyz óristetý múmkin emes. Ol qazirgi ýaqytta Qazaqstanda Ulttyq qorda jinalǵan munai satýdan túsetin úlken kiriske ábden arqa súiegen, eńbek jáne basqa resýrstardy bólýdi "qolmen basqaratyn", memleket qarjysyna qoǵamdyq jáne parlamenttik baqylaýdyń álsiregen "memlekettik kapitalizm" dep atalatyn ekonomikalyq júie qalyptasyp otyrǵanyn basa aitady.
"Mundai ámirshildik-ákimshil ekonomikalyq júie Qazaqstanda sońǵy 15 jylda baiqalǵan ekonomikalyq ósimniń sapasyzdyǵyna ákeldi jáne negizgi salalardyń ishki jalpy ónimine qosqan úlesi ekonomikany tehnologiialyq ártaraptandyrý men progrestiń joqtyǵyn kórsetedi", - deidi ol.
Muhat Temirhanov eldegi investitsiialyq jáne iskerlik ahýaldy aitarlyqtai nasharlatatyn salyqtyq ákimshilendirýdiń repressiialyq jáne sybailastyq sipatyn dereý joiý qajet ekenin de aitady.
"Qazir Parlamentte jańa Biýdjet jáne Salyq kodeksteriniń jobalary qaralyp jatyr. Bizdiń oiymyzsha, eki qujatta da Qazaqstannyń fiskaldyq saiasatyndaǵy túbegeili reformalar áli tolyq kórsetilmegen", - deidi ol.
Sondai-aq óziniń negizgi fýnktsiiasy – biznesti jáne Qazaqstan ekonomikasyn nesieleýdi oryndamai otyrǵan bank sektory men baǵaly qaǵazdar naryǵyna qatysty sarapshy mynandai usynystardy alǵa tartady:
"Bankterdiń biznesti nesielendirý kóleminiń ósýine keri áser etetin taǵy bir úlken másele – jeńildikti memlekettik nesieleýdiń josyqsyz básekelestigi. Ulttyq banktiń "2030 jylǵa deiingi aqsha-nesie saiasaty strategiiasynda" jáne QNRDA ázirlegen "Qazaqstan Respýblikasynyń qarjy sektoryn damytýdyń 2030 jylǵa deiingi tujyrymdamasynda" da bul másele talqylanady, biraq búgingi kúnge deiin máseleniń sheshimin usynatyn birde-bir resmi tulǵa joq. Bizdiń oiymyzsha, birte-birte emes, birden naryqtyq mólsherlemeden tómen mólsherleme boiynsha kásiporyndar men úi sharýashylyǵyn nesieleýdi dereý toqtatý kerek. Sonymen qatar, memleket bizneske paiyzdyq mólsherlemeni sýbsidiialaý túrindegi kómekti toqtatýy kerek dep oilamaimyz. Eger memleket paiyzdyq mólsherlemeni sýbsidiialaý arqyly ekonomikanyń belgili bir salasyna kómekteskisi kelse, onda ol muny qarjy júiesindegi naryqtyq qatynastardy buzbai-aq jasai alady. Ol úshin memleket memlekettik biýdjetten tikelei qaryz alýshyǵa naryqtyq paiyzdyq mólsherlemeni sýbsidiialaýy kerek nemese bul sýbsidiiany kompaniianyń turaqty salyq tólemderinen shegerýge bolady. Biznesti naryqtyq nesielendirýdi keńeitý úshin "Báiterek" UBH quramyna kiretin damý institýttarynyń róli men maqsattaryn qaita qaraý qajet dep sanaimyz".
Zertteýdiń tolyq nusqasymen myna aradan tanysa alasyzdar.
