Kreml propaganda quraldarynyń tuspaldaýynsha Nazarbaevtyń Máskeýge kelisinde Qazaqstannyń sońǵy ýaqyttaǵy “túsiniksiz” sheshimderi sóz bolmaq.
Aitalyq, ótken tarihqa kelgende Pýtin usynǵan pozitsiiany ólgenshe qorǵaityn federaldy BAQ:
"Máskeý qýǵyn-súrgin qurbandaryn aqtaý maqsatynda arnaiylap qurylǵan memkomissiianyń túpki maqsaty – Kremlge kúie jaǵý dep túsinedi. Memkomissiianyń Túrkistan legionyn aqtaýǵa qatysty málimdemesi qulaqqa túrpidei tidi. Nazarbaevtyń kelisinde osy másele egjei-tegjeii sóz bolady”, – degen boljam jasapty.
…
Nazarbaev pen Pýtinniń júzdesýi búginge josparlanǵan. Kezdesýde qandai máseleleri sóz bolary ázirge belgisiz.
Reseilik mass-media Kremldiń kýlýarynan jetken pysh-pysh áńgimeni odan ármen qaýlatyp, “bul jolǵy kezdesýdiń aýany bólek, Nazarbaevtyń kóńili alań…”, degen syńaida sóilepti.
“Bul joly Resei bizge baýyrlas el degen syqpyttaǵy sóz aitylmaidy. Odaqtas elderdiń arasynan ala mysyq júgirip ótken syńaily. Qazaqstannyń ár júrisin ańdyp basatyn saq saiasaty shyn mánisinde Reseiden alystai túsýdiń amaly. Kópvektorly saiasat - kózaldaý.
Aq Orda aldymen kirillitsadan bas tartty. Artynsha qýǵyn-súrgin qurbandaryn aqtaý týraly memkomissiiany quryp tastady. Vermahtyń qatarynda Qyzyl armiiaǵa qarsy kúresken Túrkistan legionyn aqtaý týraly másele kóterdi.
Munyń bári Máskeýdiń kóńiline tierin esepke almady. Pýtin ótken tarihty burmalaityndardy keshirmeidi…”, – deidi Octagon-Media.
Maqala avtorynyń aitýyna qaraǵanda Qazaqstan kez-kelgen jaǵdaida Kremlmen keńesý kerek eken, Kremldiń qas-qabaǵyn baǵyp, aýzynan shyqqan ár sózdi ańdyp otyrýǵa mindetti eken.
Avtordyń paiymdaýynsha, Qazaqstanda kún ótken saiyn rýsofobtyq kóńil-kúi kúsheiip keledi, ultshyldar ulttyq saiasatqa aralasa bastaǵan. Al muny sońy Ýkraina stsenariiine ulasýy múmkin.
Sói degen Octagon-Media Soltústik Qazaqstandy sóz etip, Kremldiń mundaǵy orystildi aýditoriiaǵa alańdaýly ekenin jetkizýge asyǵypty.
Ahýal “asqynar” bolsa Kremldiń Donbasstaǵy stsenariidi júzege asyryp, orystildi azamattarǵa Resei tólqujatyn taratýǵa májbúr bolaryn aityp sandyraqtaǵan eken.
“Bul aimaqta orystardyń úlesi basym. Olar Qazaqstannyń AQSh-tan alshaq júrgenin qalaidy. Biraq odaqtasymyz bul aýditoriianyń talap-tilegin elep-eskerer emes.
Túneýkúni amerika basylymyna suhbat bergen Muhtar Tileýberdiniń (Qazaqstannyń syrtqy ister ministri) syńaiyna qarasaq, odaqtasymyz Batystyń baýyryna kirýge qulshynyp júr. Sońǵy kezderi Batysshyl, AQSh-shyl kontent kóbeiip ketti. Nazarbaevtyń Máskeý saparynda osy másele de sóz bolady”, – deidi Octagon-Media.
…
Reseilik propaganda quraldarynyń kózine shalynǵan suhbat AQSh-tyń Newsweek jýrnalynda jariialanǵan-tuǵyn.
Maqala Qazaqstandaǵy qostildi aýditoriianyń nazarynan qalys qalǵanmen, Kremldiń úgit-nasihaty suhbattyń astarynan Reseiden irgeni aýlaq salýǵa tyrysatyn saiasatty ańdaǵan syndy.
Sonda Tileýberdi ne dedi?
Syrtqy ister ministri bizdiń eldiń demokratiiaǵa adaldyq saqtaryn, AQSh-pen áriptestikti arttyra túsýge múddeli ekenin, osy maqsatta saiasi reforma júrgizýdi jalǵastyra túserin aitqan.
“Alaida, – degen edi Tileýberdi. Mundai saiasatty saqtyqpen júrgizý kerek. "Úi ózimdiki demeńiz, úi syrtynda kisi baryn" umytpaǵaisyzdar. Irgeles otyrǵan elderdiń erekshelegin de eskerý kerek. Qazirgi geosaiasi jaǵdai ár qadamyńdy jeti ret ólshep, bir ret kesýdi talap etedi”.
Reseidiń propaganda quraldaryna Tileýberdiniń búkpesiz sóilegeni unamai qalsa kerek.
Maqalanyń túp ózegine úńilgen Kreml ideologtary: “Tileýberdi Qazaqstandaǵy demokratiianyń kenjelep qalýyna Máskeýde kinálap otyr”, – deidi.
Pýtin men Nazarbaevtyń búgingi kezdesýinde ilgeride jaittar sóz bolsa da, onyń oqyrmanǵa jetpesi, aýditoriiaǵa ashyq aitylmasy anyq.
Al mundai kontenttiń Qazaqstannyń keńistigin emin-erkin kezip júrgeni otandyq aqparattyq naryqtyń baqylaýsyz, ashyq-shashyq jatqanyn ańǵartsa kerek.
Reseidiń Qazaqstandaǵy orystildi aýditoriiany paidalanyp, bizdiń bilikti bopsalaýǵa tyrysýy bul bir emes. Aldaǵy ýaqytta mundai arandatýlar kúrt kóbeimese, azaimaidy.
Aqparat ministrliginiń buǵan qatysty ne bilgeni bar? Kreml ideologtarynyń provokatsiiasyna qalai jaýap qatpaq?!..
Ázirlegen, Dýman BYQAI
