Ózbekstan men Tájikstan býkmekerlik bıznes pen oǵan qatysty qarjylyq aǵymdardy bir ortalyqtan retteýdi usynǵan reseılik kásipker Ýmar Kremlevtiń (Lýtfýlloev) qyzmetinen bas tartty, dep jazady VCHK-OGPÝ. Al Qazaqstan áli de túpkilikti sheshim qabyldamaǵan. Bul týraly DALA INSIDE arnasy jazdy.
Bul elder ózderiniń ulttyq júıesin qurýdy jón kóripti. Sebebi olaı bolmaǵan jaǵdaıda málimetterdiń kórshiles eldiń arnaıy qyzmetteriniń qolyna túsý qaýpi týyndaıtyn edi. Kotól jazǵandaı, sońǵy bir jyl ishinde Kremlev Ortalyq Azıadan shyqpaı, birde Ózbekstanda keńestik boksshylarǵa eskertkish ashyp, birde Tájikstanda joǵary laýazymdy tulǵalarmen kezdesip, birde ózbek olımpıadashylaryna 100 myń dollardan syılyq úlestirip júrgen. Alaıda mundaı jomart qadamdar onyń basty jobasyn - aımaqtyń býkmekerlik naryǵy men qarjylyq aǵymdaryn baqylaýǵa alý bastamasyn júzege asyrýǵa kómektespedi.
Kremlevke jaqyn derekkózderdiń baǵalaýynsha, onyń Ortalyq Azıadaǵy saıahatyna 3 mıllıon dollardan astam qarajat jumsalǵan.
Degenmen Ózbekstanda bul jospar tolyqtaı sátsiz aıaqtaldy. Býkmekerlik bıznesti zańdastyrý máselesin uzaq talqylaǵan soń, bılik ony Ulttyq perspektıvalyq jobalar agenttiginiń (NAPP) quzyretine berdi.
Tájikstanda jaǵdaı Kremlev úshin odan beter kúrdeli boldy. Prezıdenttiń uly Rýstam Emomalımen kezdesýler men óziniń týǵan Gıssar aýdanynda jol salý bastamasyna qaramastan, eldegi býkmekerlik naryqty retteý Qarjy mınıstrliginiń quzyrynda qala berdi. Uzaq kelissózderden keıin Tájikstan bıligi de Reseıdiń SÝPIS júıesinen bas tartty. Kremlevtiń tarıhı otanyndaǵy qaıyrymdylyq jobalary Tájikstanǵa SÝPIS ornatýǵa kómektespedi.
Endi Qazaqstan Kremlev úshin sońǵy úmit bolyp otyr dep otyr, VCHK-OGPÝ. Bizde jaǵdaı ózgeshe órbýde.
Birneshe jyldan beri Bás tigýlerdi esepke alýdyń biryńǵaı júıesin (ESÝ) engizý tóńireginde daý-damaı tolastar emes. El ishindegi derekkózder muny Kremlev pen Reseıdiń SÝPIS júıesimen tikeleı baılanystyrady.
SÝPIS búginde Reseıdegi búkil býkmekerlik naryqty baqylaıdy ári mıllıardtaǵan tabys ákelýde. Sarapshylar "qumar oıynǵa táýeldilikpen jáne kóleńkeli shemalarmen kúres" degen resmı urannyń artynda sanksıa salynǵan banktermen baılanysty reseılik qurylymdardy Qazaqstannyń qarjy júıesine kiriktirý áreketi tur dep sanaıdy.
Qazaqstan ázirge Ýmar Kremlevtiń usynysyna naqty "joq" degen joq. Degenmen jumys toptarynda otyrǵan keıbir sheneýikter mundaı birizdendirýge alańdaýshylyq bildirip otyr. Al Qyrǵyzstanda bul másele áli talqylaný ústinde, naqty sheshim qabyldanǵan joq.
