Senatta taksi agregatorlary men jetkizý servisterinde eńbek etetin 400 myńǵa jýyq qazaqstandyqtyń áleýmettik jáne eńbek quqyqtaryn qorǵaý máselesi kóterildi. Depýtat Bibigúl Jeksenbai bul sanattaǵy azamattardyń kópshiligi negizgi eńbek kepildikterinen qaǵylyp otyrǵanyn aitty, dep habarlaidy Dalanews.kz.
Onyń sózinshe, búginde agregatorlar arqyly tabys taýyp júrgenderge aqyly eńbek demalysy, syrqattaný paraǵy, jumys ýaqytynyń normasy men eń tómengi jalaqy sekildi áleýmettik kepildikter qarastyrylmaǵan.
"Atalǵan salada jumys isteitin azamattar is júzinde eńbek naryǵynyń tolyqqandy qatysýshysy bolǵanymen, olardyń quqyqtyq mártebesi naqty aiqyndalmaǵan", - dedi senator.
Osyǵan bailanysty depýtat platformalyq qyzmette júrgen azamattarǵa "platformalyq jumyspen qamtylǵan táýelsiz jumysshy" degen arnaiy mártebe berip, olar úshin eń tómengi saǵattyq eńbekaqyny zańmen bekitýdi usyndy.
Sondai-aq Bibigúl Jeksenbai negizsiz eseptelgen salyq bereshekteri men ósimpuldardy avtomatty túrde esepten shyǵarý qajettigin atap ótti. Budan bólek, ol platformalardy akkaýnttardyń ne sebepti buǵattalǵanyn ashyq túsindirýge jáne tapsyrystardy bólý algoritmderin jariia etýge mindetteý kerek ekenin jetkizdi.
"Platformalyq jumyspen qamtý salasynda ashyqtyq pen ádildik bolýy tiis", - dedi depýtat.
Qazirgi ýaqytta atalǵan usynystar aldaǵy talqylaý úshin tiisti organdardyń qaraýyna joldandy.
