Aqordanyń habarlaýynsha, Qasym-Jomart Toqaev pen Amazon kompaniiasynyń aǵa vitse-prezidenti, jahandyq jáne quqyqtyq máseleler jónindegi bas direktory Devid Zapolski tsifrlandyrý, bailanys jáne jasandy intellekt salalaryndaǵy yntymaqtastyqtyń jai-japsaryn talqylady.
Prezident Amazon kompaniiasynyń elimizdiń Jasandy intellekt jáne tsifrlyq damý ministrligimen, sondai-aq "Qazaqtelekom" kompaniiasymen birlesken jobalardy júzege asyrý josparyna qoldaý bildirdi.
Yntymaqtastyq Qazaqstan aýmaǵyndaǵy jyldamdyǵy joǵary internetti qamtamasyz etý jáne kiberqaýipsizdikti nyǵaitý sekildi strategiialyq mańyzdy baǵyttardy qamtidy.
Amazon tek elimizge qatysty jobalardy júzege asyrýmen shektelmei, Qazaqstandy spýtniktik bailanystyń óńirlik habyn qalyptastyrýǵa bolatyn alań retinde qarastyryp otyr.
Qazaqstan Prezidentiniń Niý-Iorkke jumys sapary aiasynda "Qazaqtelekom" jáne Amazon Kuiper kompaniialary Kuiper spýtnik jelisiniń qyzmet kórsetýine qatysty distribiýtorlyq kelisimge qol qoidy.
"Soǵan sai Amazon Kuiper kompaniiasy Almaty, Aqkól jáne Aqtaý qalalarynda óziniń jerdegi infraqurylymyn jasaqtaýdy kózdeidi. Bul jobaǵa 200 million dollarǵa jýyq investitsiia salý josparlanǵan. Atalǵan bastama Memleket basshysynyń tsifrlyq infraqurylymdy damytý jáne elimizdiń barlyq óńiri úshin zamanaýi telekommýnikatsiia qyzmetine teńdei qol jetkizý tapsyrmasyn oryndaý aiasynda iske asyrylady", delingen Aqorda habarlamasynda.
Buǵan deiin álemge áigili brend Almaty oblysynda zaýyt salýǵa kiriskeni belgili boldy.
