QAZAQ HANDARYNYŃ HATTARY TABYLDY
Halyqaralyq Túrki akademiiasy ǵalymdarynan quralǵan delegatsiianyń Beijińge sapary barysynda Qazaq handyǵy tarihynyń jańa betterin ashatyn qundy qujattar tapty. Sondai-aq, olar Qazaq handyǵynyń qurylýynyń 550 jyldyǵyna arnalǵan jiyn ótkizdi.
Halyqaralyq Túrki akademiiasynyń prezidenti Darhan Qydyráli Elbasynyń Ulytaý tórinde bergen suhbatyndaǵy úzindini keltirdi. Onda: «Qazaq jurtynyń arǵy túbi ǵundardan bastalady. Ǵundardan keiin kók túrkilerge jalǵasady. Odan keiin Altyn Orda ornyǵady. Sóitip, handyq dáýirge ulasyp, keiin birtindep Táýelsizdikke kelip tireledi», – delingen. Qytailyq ǵalymdar Qazaq handyǵynyń materialdaryna qyzyǵýshylyq tanytty.
«Qazaq ǵalymdarynyń bizdiń institýtqa kelip, baiandama oqyp, pikir bólisýi qazaq tarihynyń, jalpy qazaq halqy týraly bizdiń túsinigimizdi keńeitti. Osy syndy sharalar bizdiń strategiialyq mańyzdy kórshimiz Qazaqstanmen gýmanitarlyq-mádeni qatynastyń keńeiýine oń áserin tigizedi», – dep atap ótti Qytai qoǵamdyq ǵylymdar akademiiasynyń etnologiia jáne antropologiia institýtynyń direktory Van Ianchjýn.
Belgili ǵalym, professor Bai Tsýi Tsinniń sózine qaraǵanda, 1950 jyldan qytai tilinde qazaq halqynyń tarihy men mádenieti týraly 2600-den astam ǵylymi maqala men 10-nan astam kitap jaryq kórdi. Sońǵy kezderi atalǵan baǵytty zertteý boiynsha doktorlyq jáne magistrlyq jumystar sany kóbeigen.
Sapar barysynda HTA ǵalymdary Qazaq handyǵy týraly buryn jariialanbaǵan qundy qujattardy qolǵa túsirdi. Solardyń ishinde qazaq handary men sultandarynyń Tsin imperatoryna shaǵatai jáne qalmaq tilderinde jazǵan hattary, Qazaq handyǵy men Tsin memleketi arasyndaǵy diplomatiialyq bailanys týraly manchjýr tilindegi mańyzdy qoljazbalar bar.
