Sary aiaz qaǵady qyraýly qabaǵyn,
Qolymda dirildep qaýyrsyn qalamym.
Oilardyń túspeidi izderi qaǵazǵa,
Ulpa qar tósine muńymdy jazamyn.
Aq kórpe jamylyp, qara jer uiqyda,
Sál jaýrap men turmyn oilanyp syrtynda.
Tobyqtai muz uiqas shaǵýǵa kelmeitin,
Týlaǵan shabyttyń eridi urtynda.
Jylýlyq qalmaǵan appaq jer betinde,
Oiymnyń jylynam laýlaǵan órtinde.
Qańtarǵan shabytym qazyǵyn mújidi,
Qańtarda qaqaǵan sýyq jel ótinde.
Taldardy aiaimyn daýylda úsigen,
Oilaryn tappaimyn oilaǵan ishinen.
Tamyryn jylytyp jer asty sýyna,
Tamyrsyz meni aiap turǵanyn túsinem.
Taýlar da basyp ap kiipti bórigin.
Men jaqqa qaraidy kún tistep erinin,
Kók muzda kisinep qulyn-jyr týlaidy,
Ómirdiń tistelep sý alǵan jelinin.
Dúniege kelgenmin osyndai daýylda,
Bul yzǵar bar meniń týlaǵan qanymda.
Óleńim bolmasa dirildep jaýraǵan,
Al meniń qaqym joq sýyqqa nalýǵa.
Jambyl TÓREBEKULY
