Qazaqstan Respýblikasynyń Memlekettik keńesshisi Erlan Qarin "Jańa Qazaqstannyń túri osy ma?" deitinderge jaýap berdi, - dep habarlaidy Dalanews.kz.
Keide «Reformalar nátijesi qaida, ýáde etilgen ózgerister qaida? Jańa Qazaqstannyń túri osy ma?» degen pikirler aitylyp qalady.
Birinshiden, ózgerister áp-sátte jasala qoimaidy. Reformalardy júzege asyrý úshin orasan zor kúsh-jiger, qisapsyz ýaqyt qajet. Máseleniń mán-jaiyn bilmeitin adamǵa bul úderis tym uzaqqa sozylyp bara jatqan sekildi kórinýi múmkin. Degenmen ózgerister bar. Kez kelgen reforma – qajyrly eńbekti talap etetin asa kúrdeli jumys. Kim ne dese o desin, Qazaqstan reformalar jolymen senimdi qadam basyp keledi.
Ekinshiden, bizdiń elimizde sońǵy bes jylda kishigirim ózgerister emes, kerisinshe, kóptegen salada túbegeili ári júieli betburys jasaldy. Eger tereńirek oilanyp kórseńiz, nebári úsh jyldyń ishinde búkil saiasi júieniń qurylymy qaita jasaqtalǵanyn ańǵarasyz. 2019–2021 jyldardaǵy saiasi reformalar 2022 jylǵy konstitýtsiialyq reformaǵa ulasyp, sonyń nátijesinde elimizdegi memlekettik institýttardyń mártebesi men róli edáýir artty. Konstitýtsiialyq sot jumys istei bastady. Prezidenttiń quzyryna kiretin máseleler azaiyp, kerisinshe, Parlamenttiń quzyreti keńeidi. Aralas sailaý júiesi engizildi, saiasi partiialardy tirkeý rásimi jeńildedi. Tuńǵysh ret aýyl ákimderi tikelei sailanatyn boldy. 2021–2023 jyldardaǵy sailaý qorytyndysynda aýyl ákimderiniń úshten ekisi jańardy. Byltyr alǵash ret aýdan jáne oblystyq mańyzy bar qala ákimderin sailap kórdik. Mundai sailaýlar 2025 jyldan bastap turaqty ótkiziletin bolady.
Bul az deseńiz, reformalar Qazaqstanǵa ǵana emes, ainalamyzdaǵy aýqymdy geosaiasi keńistikke de jańashyldyq ákelip, osy aimaqtaǵy elder úshin jańa úrdisti bastap berdi.
Úshinshiden, saiasi reformalarmen qatar ekonomikalyq jáne áleýmettik-gýmanitarlyq salalarda da mańyzdy ózgerister jasalyp jatyr. Halyqtyń turmysyn jaqsartý úshin baǵaly bastamalar men naqty jobalar júzege asyrylyp keledi. Júieli ári keshendi jumystar qazirdiń ózinde jemisin bere bastady. Eń tómengi eńbekaqy kólemi eki esege artty. Bul 1,8 million adamnyń tabysyna tikelei áser etti. Ustazdar men dárigerlerdiń, sondai-aq ǵalymdardyń jalaqysy kóbeiip, olardy áleýmettik turǵydan qorǵaý sharalary kúsheidi.
Memleket basshysynyń bastamasymen jurtqa turǵyn úi jaǵdaiy men densaýlyǵyn jaqsartý úshin zeinetaqy jinaǵynyń bir bóligin alýǵa múmkindik berildi. Bul múmkindikti millionǵa jýyq azamat paidalanyp úlgerdi. «Jaily mektep», «Aýylda densaýlyq saqtaýdy jańǵyrtý» sekildi aýqymdy ulttyq infraqurylymdyq jobalar júzege asyrylyp jatyr. Sonyń aiasynda barlyq aimaqta júzdegen mektep pen densaýlyq saqtaý nysany salyna bastady. Degenmen eń bastysy – reformalar qoǵamdyq qatynastardyń sipatyn birjola ózgertti, ulttyń saiasi mentaliteti ósip, azamattyq belsendiligi artyp keledi, turǵyndar eldik máselelerge erkin aralasatyn boldy, jurttyń bir-birine degen janashyrlyǵy nyǵaia tústi, qoǵamdyq pikir saiasi ómirge edáýir yqpal ete bastady. Saiasi mádenietke qatysty bul ózgeristerdi keri qaitarý esh múmkin emes.
Osylaisha, elimizde túbegeili ózgerister jasaldy, jańarýlar áli de jalǵasyp keledi. Júzege asyrylyp jatqan jan-jaqty reformalar endi toqtamaidy.
