Almatyda órt qaýipsizdigin qamtamasyz etý men oqys oqiǵanyń sanyn azaitýdy kózdeitin naýqan jalǵasýda. Ásirese otynmen jylityn, qaýipti aimaqta ornalasqan úiler erekshe baqylaýǵa alyndy. Bul týraly Óńirlik kommýnikatsiialar qyzmetine Almaty qalasy TJD Memlekettik órt baqylaý basqarmasynyń basshysy Konstantin Kanin málimdedi, dep habarlaidy Dalanews.kz.
Halyqty qulaqtandyryp, oqys jaǵdaidyń aldyn alý úshin nasihattaý men túsindirme jumysy qolǵa alynǵan. Áleýmettik osal toptaǵylar turatyn 686 úi men oǵash qylyqty adamdar turatyn 2067 úi osyndaǵy eń qaýipti sanatqa kiredi. «Qaýipsiz pesh», «Taza tútin» men «Kómek qoly» dep atalatyn aktsiialardyń aiasynda osylardyń barlyǵy tekserýden ótti.
Esterińizge salsaq, megapoliste órt qaýipsizdigi ailyǵy ótti. Osy ýaqyt ishinde TJD qyzmetkerleri jeke sektordaǵy jáne kópqabatty úilerdegi turǵyndarmen kezdesýler ótkizip, úilerdi aralap, turǵyndarǵa órt qaýipsizdiginiń talaptaryn túsindirdi. Turǵyndarǵa jylytý qurylǵylaryn qaýipsiz paidalanýǵa qatysty nusqaýlyqtar men býkletter taratyldy.
Bul jumys «Qyzyl Ai Qoǵamy», «Lider.kz» men «Qazaqstan eriktiler ligasy» siiaqty uiymdar men «QazTransGaz Aimaq» AQ óndiristik bólimshesimen birlesip júzege asty. Gaz qazandyǵyn qoldanatyn úilerge erekshe nazar aýdaryldy.
Halyqtyń keńinen habardar bolýy úshin Departament órt qaýipsizdigi erejeleri týraly eske salý SMS-habarlamalaryn uiymdastyryp, 7,6 millionnan astam abonent habarlamany aldy.
Internette, onyń ishinde áleýmettik jelilerde 260 profilaktikalyq material jaryq kórdi. Halyq kóp jinalatyn nysandarda jylý qurylǵylaryn qaýipsiz paidalanýdy nasihattaý jaǵy da eskerilgen.
«Jylytý maýsymy kezinde tútin shyǵaratyn qondyrǵyny keminde eki aida bir ret tazalap turý kerek. Peshti shamadan tys qyzdyrmańyz, olardy tez tutanatyn, lap ete qalatyn zatqa jaqyn ornalastyrmańyz. Gazben jumys isteitin peshti paidalanýdyń nusqaýlyǵyn qatań saqtańyz. Peshti, gaz kolonkasyn, as úi plitasyn, kerogaz ben elektr qurylǵylaryn balalardan aýlaqtaý ustap, qaraýsyz qaldyrmańyz», - dep qorytyndylady Konstantin Kanin.
