Almatynyń Túrksib aýdanynda №20 orta mektepti keńeitý josparlanyp otyr. Jobanyń maqsaty – oqýshylar úshin zamanaýi ári qolaily bilim berý ortasyn qalyptastyrý. Bastama áleýmettik infraqurylymdy damytý baǵdarlamasy aiasynda qolǵa alynǵan. Baǵdarlamanyń basty mindeti – turǵyndar sanynyń ósýine sai balalardy sapaly bilimmen qamtamasyz etý. Bul jóninde qalalyq bilim basqarmasy málimdedi, dep habarlaidy Dalanews.kz.
Búginde mektep ǵimaraty shamadan tys júktelgen: oqýshylar sany jobalyq qýattylyqtan eki esege artyq, balalardyń bir bóligi ekinshi aýysymda oqýǵa májbúr. Sonymen qatar, mektep ǵimaraty seismologiialyq jáne zamanaýi bilim berý standarttaryna tolyq sai kelmeidi.
Qalalyq bilim basqarmasy basshysynyń orynbasary Muhtar Tájibaev jańa nysannyń barlyq zamanaýi talapqa sai bolatynyn atap ótti.
«Jańa mektep bir aýysymda jumys isteidi, oqý baǵdarlamasy keńeitiledi, al infraqurylym zaman talabyna sai bolady. Bizdiń maqsat – balalarǵa jaryq, keń ári qaýipsiz synyptar daiyndaý. Bul Almaty qalasynyń mártebesine sai bilim keńistigin qalyptastyrady», – dedi ol.
Almatynyń jer qatynastary basqarmasynyń ókilderi jer telimderin memleket qajetine alý tártibin túsindirdi. Kei turǵyndar ýchaske turǵyn úi keshenin salýǵa beriledi degen alańdaýshylyq bildirgen. Alaida bul qaýeset resmi túrde joqqa shyǵaryldy.
«Memleket qajetine alynǵan jerler tek maqsatyna sai paidalanylady jáne úshinshi tulǵalarǵa nemese kommertsiialyq maqsatta berilýi múmkin emes. Bul jaǵdaida tek oqý nysanyn salý týraly sóz bolyp otyr», – dep naqtylady basqarma ókilderi.
№20 mekteptiń direktory Gúlnár Sársenbaeva da keńeitýdiń mańyzdylyǵyn atap ótti.
«Mektep uzaq jyl boiy shamadan tys júktememen jumys istep keledi. Keńeitý jobasy oqý kabinetteriniń tapshylyǵyn joiyp, balalarǵa zaman talabyna sai bilim berý ortasyn qurýǵa múmkindik beredi», – dedi ol.
Almaty qalalyq máslihatynyń depýtaty Beibit Qusaiynov turǵyndardyń barlyq ótinishi men eskertpesi nazarǵa alynǵanyn, ári talqylaýlar ashyq formatta jalǵasatynyn aitty.
«Bul áleýmettik baǵyttaǵy joba. Bizdiń mindetimiz úderistiń ashyqtyǵyn qamtamasyz etý, azamattardyń zańdy quqyǵyn saqtaý jáne bilim salasyn damytý jónindegi memlekettik mindetterdi oryndaý», – dedi depýtat.
№20 mekteptiń keńeitilýi Almaty qalasyndaǵy bilim berý infraqurylymyn jańǵyrtýdyń keshendi baǵdarlamasynyń bir bóligi bolmaq. Qala biligi bilim salasyn strategiialyq damý baǵyty jáne adami kapitaldy nyǵaitýdyń negizgi tiregi retinde qarastyrady.
