Buǵan deiin KTK telearnasy sharýalardyń sapary Aýyl sharýashylyǵy ministrliginiń sheneýnikteri úshin kútpegen jaǵdai bolǵanyn habarlaǵan bolatyn.
Mańǵystaý oblysynan kelgen sharýa Ádilbek Saǵyndyqov Qarashókeevtiń qyzmetinen ketip, kásibi mamanǵa jol berýge mindetti ekenin málimdegen bolatyn.
"Ornyńyzdan ketýińiz kerek. Al sizdiń ornyńyzǵa halqyna jany ashityn jaqsy maman tabý kerek. Renjimeńiz, biraq Mańǵystaý turǵyndary sizdiń jumysyńyzǵa kóńilderi tolmaǵandyqtan ashýly. Bizdiń qalaýymyz – tezirek áreket etip, aimaqqa qoldaý kórsetýlerińiz. Qystyń eki aiy ǵana qaldy, aman ótýge kómektesińiz. Ótken jylmen salystyrsaq, Mańǵystaýda maldyń tek tórtten biri ǵana qaldy. Eger qalǵan mal basy Aqtóbege nemese Oralǵa satyldy desem, ótirik aitqanym emes", – dedi mańǵystaýlyq fermer Ádilbek Saǵyndyqov.
Ministr Ortalyq kommýnikatsiialar qyzmetindegi baspasóz konferentsiiasy barysynda tórt saǵat boiy sharýalarmen kezdesý ótkizip, olarǵa qajet qoldaý sharalary týraly áńmileskenin aitty.
"Men Úkimet múshesi bolsam da, meniń taǵaiyndalýym nemese otstavkaǵa ketýim týraly sheshimdi basshylyq qabyldaidy", – dep jaýap berdi ministr.
Aita keteiik, mańǵystaýlyq sharýalar jazǵy qurǵaqshylyq pen maldyń jappai qyrylýynan keiin memlekettiń durys qoldaý kórsetpegenine narazylyqtaryn bildirdi.
Fermerler qyrylǵan maldy qaita sanaýdy talap etip otyr. Olar ólgen maldyń sany 1700-den kóp ekenin aitýda. Sondai-aq sharýalar jemniń quny joǵary ekenin málimdedi. Tipti eń qymbat shóp – Mańǵystaý oblysynda kórinedi. Eger osylai jalǵasa berse, qysta aimaqtaǵy qalǵan mal qaita qyrylatynyn sóz qyldy. Sharýalar sheneýnikterden máselege shuǵyl aralasyp, baǵanyń tómendeýin qolǵa alýdy surap otyr.
