Oblys ákimi eń birinshi Qaskeleń toptyq sý qubyry qurylysynyń jobasymen tanysty. Oǵan respýblikalyq biýdjetten 12 mlrd. teńge bólingen. Nysan Qaskeleń qalasymen qatar 18 eldi mekendi aýyz sýmen úzdiksiz qamti alady.
Búgingi kúni jobanyń I kezeginiń 1-shi iske qosý kesheni tolyǵymen aiaqtalǵan. Bas sý qoimasynan Qaskeleńge deiin sý tazartý stansasy arqyly qubyr tartylǵan. Sonyń arqasynda turǵyndar sapaly aýyz sýǵa qol jetkizetin bolady. Qazirgi kezde qujattardy tirkeý jumystary júrip jatyr. Sondai-aq 2 jáne 3-shi iske qosý kesheni jobasynyń aiasynda magistraldy sý qubyry men jetkizý jelileri qurylysynyń jobasy memlekettik saraptamadan ótkizilýde. Munan keiin eldi mekender ishine rezervýarlar men sorǵy stansalary ornatylatyn bolady.
– Qarasai aýdanynyń, sonyń ishinde Almaty qalasy mańyndaǵy eldi mekenderdiń de sýmen qamtý máselesin aldaǵy eki-úsh jyl kóleminde sheshýimiz kerek. Bul – basymdyq beretin mindet. Baý-baqsha sýarýda másele týyndamaý úshin aryq júielerin de retke keltirýimiz kerek. Bul máseleni sheshýge aýdan ákimdigi qazirden kirisýi tiis, – dedi Qanat Bozymbaev.
Munan soń Qanat Bozymbaev Qazaqstan Respýblikasy Tuńǵysh Prezidentiniń «Atameken» tarihi-mádeni ortalyǵyn aralap, odan ári «Úshqońyr» dene shynyqtyrý-saýyqtyrý keshenine keldi.
Sport kesheni holynda oblys ákimine 2018 jyly bekitilgen Almaty oblysy aýmaǵynyń qala qurylystyq josparlaýynyń keshendi syzbasy men Qaskeleń qalasynyń bas jospary tanystyryldy. Josparlar jaiyn «Ýrbostil» JShS jetekshisi Liýbov Nysanbaeva baiandady.
– Almatyǵa jaqyn jatqan aýdandardy tiimdi damytý úshin jumystyń negizgi printsipterin Almaty qalasy ákimdigimen kelisip atqarýymyz kerek. Birlesip sheshetin máseleler óte kóp. Qaskeleń qalasynyń bas josparyna keletin bolsaq, ony iske asyrý úshin inyvestorlar tartqan jón. 2022 jylǵa egjei-tegjeili jospar daiyndaý kerek. Qaskeleńniń úlgili qala bolýǵa barlyq múmkindigi bar. Onyń ústine kólik infraqurylymyn damytý jumystary bastaldy, – dep atap ótti Qanat Bozymbaev.
Osy jerde «Altyn orda» saýda-logistikalyq kesheniniń egjei-tegjeili jobasy, sol siiaqty Tuńǵysh Prezident saiabaǵy qurylysynyń jospary da kórsetildi. Tuńǵysh Prezident saiabaǵynyń jobasyn júzege asyrýdy baqylaý tapsyryldy. Aldymen jer ýchaskesi belgilenip, odan keiin naqty jobasy daiyndala bastaýy tiis.
Sporttyq keshenniń ishin aralap, barlyq materialdyq-tehnikalyq múmkindikterimen tanysqannan soń Qanat Bozymbaev Qarasai, Jambyl, Ile aýdandarynyń balalary úshin sport internatyn salý jobasyn daiyndaýdy tapsyrdy.
– Sport kesheninde buqaralyq sportty damytýǵa, jastardy salamatty ómir saltyna tartýǵa barlyq jaǵdai jasalǵan. Sport internattary Taldyqorǵan qalasy men Alakól aýdanynda bar. Biraq Almaty mańyndaǵy aýdandarda joq, al Taldyqorǵanǵa barý balalar úshin alys. Sondyqtan Qarasai aýdanynda sport internatyn salý týraly naqty usynys engizińizder, – dedi oblys ákimi.
Budan ári oblys basshysy Qaskeleńdegi aýdandyq aýrýhananyń juqpaly aýrýlar bólimine bardy. Mundaǵy indetpen kúres sharalarynyń qalai atqaryp jatqanyna nazar aýdardy. Ǵimarat kúrdeli jóndeýdi qajet etedi, bir korpýsy 1990 jyldary salynǵan, al qalǵan bóligi 1936 jyly turǵyzylǵan. Jaýapty tulǵalardyń aitýynsha, seismikalyq kúsheitý jumystary men kúrdeli jóndeý jasaý josparlanýda. Sonymen qatar osy kezdesýde qazirgi epidemiologiialyq jaǵdaidy eskere otyryp, aýrýhananyń bir bólimi emes, óz aldyna bólek infektsiialyq aýrýhana bolýy úshin tósek oryn sanyn arttyrý, qosalqy japsarjai salý týraly da sóz boldy.
Osy saparda Qanat Bozymbaev aýdandaǵy irgeli kásiporyndardyń biri, konditerlik ónimder shyǵaratyn «Hamle» JShS-ǵa bardy. Munda jylyna 14 myń tonna daiyn ónim shyǵarylady. Assortimentte pechene, vafli, vafli torttary, shokolad ónimderi siiaqty 80-nen astam ónim túrleri bar. Daiyn ónimniń 40% eksportqa shyǵarylady. Kásiporynda 900 adam eńbek etedi. Zaýyt jyl saiyn konditerlik ónimder úshin 4 mlrd. teńgege otandyq shikizat satyp alady.
Zaýyttyń óndiris protsesimen, daiyn ónim túrlerimen tanysqan oblys ákimi Qanat Bozymbaev kásiporynnyń damý barysy jaily surap bildi. Áńgimelesý barysynda tamaq ónerkásibi salasyndaǵy mamandardyń jetispeitini aityldy.
Oblys ákimi aýdan ákimdigine óńirdegi kolledjder men zaýyt arasynda yntymaqtastyq ornatýǵa yqpal etýdi tapsyryp, dýaldy oqytý negizinde kadr máselesin sheshýge bolatynyn aitty.
– Kolledj mamandar daiyndap beredi, al sizder olardy taǵylymdamadan ótkizesizder. Sóitip ózara birlesip jaqsy mamandar daiyndap, jumys ornymen qamtisyzdar, – dedi Qanat Bozymbaev.
Sapar barysynda oblys basshysy óńir aktivimen kezdesý ótkizip, aimaqtyń damýy jáne týyndaǵan problemalardy sheshý joldaryn talqylady.
Aktiv jiyny barysynda aldymen aýdan ákimi Jandarbek Dalabaev óńirdiń ótken 10 aidaǵy damý qorytyndylary týraly qysqasha habarlap, aldaǵy josparlaryna toqtaldy.
Baiandama aiaqtalǵan soń oblys ákimi biyl aýdanda náreste ólimi faktilerine, azyq-túlik óndirisiniń aitarlyqtai tómendeýine, áleýmettik sipattaǵy qylmystyń artýyna jol berilgenin atap ótip, jaǵdaidy jyldam túzeý kerektigin eskertti.
Keńesti qorytyndylai kele, joǵaryda aitylǵan kemshilikterdi eskere otyryp aýdan ákimine jáne aýdannyń atqarýshy organdaryna birqatar naqty tapsyrmalar berdi. Munda basty basymdyq Prezidenttiń Joldaýyndaǵy mindetterge jáne memlekettik baǵdarlamalardyń sapaly oryndalýyna beriletin bolady.
– Qarasai aýdany – oblys ekonomikasyn damytýdaǵy mańyzdy óńirlerdiń biri. Onyń ústine Almatynyń irgesinde ornalasqan, bul damý múmkindikterine keńinen jol ashady. Soǵan qaramastan óńirde aýyz sý sapasyn jaqsartý, gaz, elektrmen jabdyqtaý, jol máseleleri infraqurylymdaryna bailanysty birqatar máseleler bar. Halyq tyǵyz ornalasqan bul aýdanda osy máselelerdi aldaǵy 2-3 jylda sheshýimiz kerek jáne bul Qarasai aýdanynyń jergilikti atqarýshy organynyń basty baǵyty bolýy tiis. Aýdanǵa investitsiia tartý jumystaryn jalǵastyryńyzdar. Biýdjet shyǵyndaryn azaitý úshin memlekettik-jekemenshik áriptestiktiń áleýetin, ásirese mektepter men balabaqshalar salýda kóbirek paidalaný kerek. Jańa jumys oryndaryn kóptep ashý, sonyń ishinde kóp balaly otbasylar úshin jumys oryndaryn qurýǵa erekshe nazar aýdarýymyz kerek. Áleýmettik mańyzdy azyq-túliktiń, kommýnaldyq qyzmet tarifi baǵasynyń negizsiz ósýine jol bermeńizder. Jylytý maýsymy úzdiksiz ótýi tiis. Turǵyndardyń aryz-shaǵymdaryna ýaqytynda mán berip otyryńyzdar. Qylmysty boldyrmaý maqsatynda aldyn alý jumystaryn uiymdastyrýdy tapsyramyn. Aýdan halqynyń ál-aýqatyn arttyrý, ekonomikanyń turaqty ósimin saqtaý, sondai-aq halyqtyń usynys-pikirlerin júzege asyrý jóninde is-sharalardy qolǵa alý kerek, – dedi Qanat Bozymbaev.
