«QazAvtoJol» UK» AQ Almaty oblystyq filialynyń direktory Bolatbek Aitbaevtyń habarlamasyn tyńdaǵannan keiin Qanat Bozymbaev óziniń birqatar usynystaryn bildirdi. Almaty – Bishkek jolynyń «Altyn orta» bazary tusyndaǵy ýchaskesi asfalttyń tómengi jabyny tóselgen, iaǵni tegis emes qalpymen ýaqytsha paidalanýǵa beriletin bolady. Bul rette oblys ákimi joldy bir aidyń ishinde iske qosýdy, al asfalttyń ústińgi sońǵy jabynyn kóktemde tósep bitirýdi tapsyrdy. Osyǵan bailanysty Qanat Bozymbaev filial basshysyna bul jóninde halyqqa keńinen túsindirý kerektigin eskertti. Sol siiaqty BAKAD qiylysyna deiingi jol bóligin 5 jolaqty etýdi qarastyrýdy usyndy.
Sonymen birge osy kezdesý barysynda Qanat Aldabergenulyna BAKAD qurylysyna qatysty jobalar da tanystyryldy. Osy oraida oblys ákimi aldaǵy ýaqytta joba qurylysyna qatysty tapsyrys berýshiler men merdiger uiymdardyń ókilderi jáne Ile, Jambyl, Talǵar aýdandary ákimderiniń qatysýymen jiyn ótkizip, jol máselesi keńinen talqylanatyn aitty.
Budan ári «Kagazy Recycling» JShS-nyń óndiriste paidalanylǵan qaldyq sýlarynyń jinaqtalýynan mańaiǵa jaiylyp, ásirese «Asyl Arman» turǵyn úi kesheni turǵyndaryn mazalap otyrǵan jaǵymsyz iisti boldyrmaý máselesi de talqylandy. Mekeme ókili kúnine 1800 tekshe metr sý paidalanylatynyn jáne tazartý qurylǵysy ornatylǵanymen, paidalanylǵan sýdyń 40 paiyzy qaita qoldanylyp, al 60 paiyzy shyǵaryndy bolyp otyrǵanyn aitty. Oblys ákiminiń aitýynsha, búgingi HHI ǵasyrda zamanaýi tehnologiia ónidiriste qoldanǵan sýdy tolyǵymen qaita tazartyp, paidalanýǵa múmkindik beredi.
– Sýdy qajetti deńgeide, sapaly kólemde tazartatyn quraldar satyp alyńyzdar. Árine, mundai ozyq tehnologiiany engizý úlken qarjyny talap etýi múmkin. Bul úshin kásiporynǵa jergilikti organ tarapynan qandai qoldaý kerek? Áli de bul máseleni jan-jaqty zertteiik. Qalai degende de turǵyndar úshin bul máseleni tiimdi sheshýimiz kerek, – dedi Qanat Bozymbaev.
Saparynyń sońynda oblys ákimi «Antigen» ǵylymi-óndiristik kásipornynda bolyp, onyń vaktsina óndirý isindegi jańalyqtarymen tanysty. Mekeme direktory Nurlan Ahmetsadyqovtyń aitýynsha, 1998 jyldan veterinariia salasy baǵytynda jumysyn bastaǵan kásiporyn sońǵy bir-eki jyl kóleminde meditsinaǵa bet burǵan. Biyl "QazVac" vaktsinasyn quiý men jańa jelini iske qosýǵa arnalǵan qural-jabdyqtardy memleket qarajatynan satyp alǵan, oǵan «Jetisý» ÁKK arqyly jergilikti biýdjetten 420 mln. teńge bólindi. 2021 jylǵy tamyz aiynda zaýyt "QazVac" vaktsinasyn quiýǵa arnalǵan jelini testilik rejimde iske qosty, 300 myń dozaǵa arnalǵan 3 validatsiialyq seriia ázirlendi. Qural-jabdyqtar Germaniia, Italiia, Qytaidan jetkizildi. Endi koronavirýstan basqa 4 túrli syrqatqa qarsy vaktsina óndirý jobasyn usynyp otyr. Mekemeniń óndiris protsesimen tanysqan oblys ákimi Qanat Bozymbaev birlesip jumys isteýge nietti ekenin aitty.
