Tańǵalmaimyz. Ázirgi áńgime sailaý týraly emes.
Rejisser Vitalii Manskii (sýrette) osydan 18 jyl burynǵy Pýtindi eske alypty. Osydan 18 jyl buryn 26 naýryzda Pýtin bilikke kelgen.
«Boldy. Bitti. Ketip baramyn. Qolymnan kelgenniń bárin jasadym... Bul jigitti (Pýtindi aitady, red.) 20 úmitkerdiń arasynan iriktep aldym» degen edi marqum Boris Eltsin.
1999 jyly sol tusta FSB-ny basqaryp turǵan Pýtin prezident mindetin ýaqytsha atqarýshy bolyp taǵaiyndalady. Ol jyldary az da bolsa da, saiasi báseke bar-tyn.
«Pýtin alǵashqy ainalymda jeńe me, álde qaitara sailaý ótkizýdiń qajettiligi týyndai ma?» degen saýal ózekti-tuǵyn. Pýtinniń sailaýaldy shtabyn prezident ákimshiligi jetekshisiniń orynbasary Dmitrii Medvedev basqarǵan.
Sodan beri 18 jyl ótipti...
Manskii bolsa, ań-tań.
«Bul qalai? Áli otyr ma? 18 jyl artta qaldy, alda 6 jyl bar. Qosa alǵanda Pýtinniń biliktegi merzimi 24 jylǵa sozylmaq. Shirek ǵasyrǵa jetip jyǵylmaq. Odan árige sozylýy da ǵajap emes...» deidi ol.
Rejisserdiń Resei prezidenti týraly pikirin yqshamdap usynyp otyrmyz.
Aidahar
2000-shy jyldardyń basyndaǵy Pýtin múlde bólek edi. Bolmysy bólek edi. Súikimdi edi. Sóz tyńdaityn edi. Pikir almasýǵa ázir edi ol.
Qazirgi Pýtin múlde bólek. Bul tipti osydan 5 jyl burynǵy Pýtin emes.
Anyǵy, Pýtin joq. Et pen súiekten jaralǵan adam emes bul. Aidahar. Ajdaha. Adam Pýtindi aidahar Pýtin jeńip ketti. Ýystan shyǵyp ketti ol.
Anyǵy, dál qazir Pýtinniń qolynda bilik joq. Ol bilikten áldeqashan aiyrylǵan.
Tipti bir kúni tańsáriden oianyp, óziniń jaza basqanyn, qateleskenin túsinse de, ony túzeýge tyryssa da, qolynan kelmeidi. Sebebi, aidahar Pýtin et pen súiekten jaralǵan adam Pýtindi joq qylyp jibergen.
Ókinishtisi, bul aidahar Reseidi áli uzaq jyl basqaratyn bolady.
Pýtinniń tusyndaǵy Reseide bolashaq joq. Aǵa býynǵa báribir. Súrer ǵumyryn súrdi. Pýtin bilikke kelgen tusta ómirge kelgen urpaq jaqsy sezinedi muny. Sezinedi dep oilaimyn...
Burynǵy jáne qazirgi Pýtin
Pýtin qalypty ómirge qaityp oralmaidy endi. Orala da almaidy. Múmkin emes. Qazirgi júie, biliktiń reseilik nusqasy bárin búldiredi. Bárin buzady. Pýtinnen bastap biliktiń eń tómengi satysynda júrgen ákim-qaralarǵa deiin bári «buzylǵan». Kisilikten ketken, adamdyqtan alystaǵan.
Bilik ózgertken bulardyń barlyǵyn. Azǵyrǵan. Azǵyndandyrǵan. Endeshe Pýtindi oilap kórińiz?
18 jyl boiy úzdiksiz bilep kele jatqan Pýtin áýel bastaǵy, ana sútimen daryǵan adami qasietterin saqtap qaldy dep oilaisyz ba? Búgingi bilik júiesi Pýtindi munyń bárinen ada qyldy.
Pýtin ǵana emes, basqasyna da qatysty bul. Bilik ózgertedi adamdy. Buzady. Nietin buzady. Piǵylyn buzady.
Osydan 18 jyl burynǵy Pýtin men qazirgi Pýtinniń arasy jer men kóktei.
2000-shy jyldary úiip-tógip bergen demokratiialyq urandary men ýádelerin umytyp ketti ol. Esinde joq. Sanasynan, kóńil kózinen óshken. Bálkim, sol shaqta onyń sózderi shynaiy bolǵan shyǵar, biraq qazirgi shaqta bulardyń tyrnaq ushyndai kúshi joq.
Pýtin óz-ózin saqtap qala almady. Bylǵandy. Batpaqqa batty.
Pýtinizmniń eń alǵashqy qurbandyǵy da Pýtinniń ózi. Ol bas erkindiginen áldeqashan aiyrylǵan. Sondyqtan onyń urandary men ýádeleriniń kúshi de, máni de joq.
Ol endi qalypty ómirge qaita orala almaidy. Múmkin emes. Ony esh jerge syiǵyzbaidy. Onyń jalǵyz qonysy da, qorǵanyshy da bilik. Basqa barar jeri, basar taýy joq.
Aittym ǵoi, syidyrmaidy. Bilikten ketken kúni, bilikten taiǵan kúni qaida barady Pýtin? Qaida panalaidy? Bilmeimin.
Bálkim, Venesýelaǵa kósher. Bálkim, Soltústik Koreiadan pana tabar.
Ol ózi qurǵan qaqpanǵa ózi tústi. Óz-ózin buryshqa tyqty. Óz-ózin tyǵyryqqa tiredi.
Oǵan qaraǵanda...
Iá, oǵan qaraǵanda Gorbachev durys edi. Pýtinmen de, Eltsinmen de tildesken adammyn.
Solardyń arasynda Gorbachevtyń kisiligi baryn sezdim.
Ol kisiligin saqtap qaldy. Bilik ony buza alǵan joq. Buzyp úlgere almady.
Gorbachevtyń biligi uzaqqa sozylǵan joq.
Ol qalypty ómirdiń, qarapaiym ómirdiń dám-tuzyn tatty. Aǵzasyn tazartty. Biliktiń bálkim dýasynan, bálkim ýytynan aman qaldy.
Bilik – aýrý. Bilikte bolý – aýrý. Bilik qurý – aýrý. Odan aiyǵý qiyn. Gorbachev bul dertten der kezinde qutyldy.
Biliktiń aýrý ekenin demokratiialyq elder baiaǵydan biledi. Bulardyń Ata zańdary diktatýraǵa, diktatorlarǵa qas. Diktatorlyq belgileri barlardy bilikke jolatpaidy.
Mundailar bilikke bir jarmassa, qaitip jibermeýi múmkin.
Diktatýra demokratiianyń jaýy nemese kerisinshe...
Uzaq bilikte otyrý demokratiia úshin nonsens.
Pýtin muny bilmeidi emes, biledi. Batystyń qundylyqtarynan qorqady ol.
Biz
Pýtinniń búgingidei bolǵanyna, búgingidei keiipke engenine biz, myna biz kinálimiz. Biz, myna biz búgingi Pýtindi jasap shyǵarǵan.
Anyǵy, biz sybailasymyz onyń. Sybailasyna ainalǵanymyzdy baiqamai da qaldyq.
Biz kinálimiz Pýtinniń mundai bolǵanyna. Búgingi keteýi ketken turmysymyzdy da basqadan emes, áýelde ózimizden kórýimiz kerek.
Pýtindi aidaharǵa ainaldyrdyq. Ol ósti. Ózgerdi. Kúsheidi.
Reseidegi 143 mln. halyq Reseidiń emes, Pýtinniń qol astynda qazir. Pýtin halyqty qolshoqpar qyldy.
Aǵa býyn, orta býyn. Olarǵa báribir. Olar óz urpaǵyn da ózderi siiaqty tárbileýde.
Mektepke barǵan da bala erteń mektep bitirgende de Pýtinniń joldaýyn tyńdaityn bolady. Pýtin ol kezde de bolady. Bola bermek.
Pýtin bilikke kelgen tusta ómirge kelgen urpaqty Kreml ýlap jatyr qazir. Nasihatymen. Aqparatymen...
Ilgeride aittym, alda áli 6 jyl bar. Pýtin áli 6 jyl bilep tósteitin boldy. Jiyntyǵy 24 jyl. Budan keiin ne bolmaq? Bilmeimin. Belgisiz...
Ázirlegen, Dýman BYQAI
