Shyǵysta tasqynnan zardap shekkender jaqyn arada baspanaly bolady
Glýbokoege 60 million teńge bólinbek
Jiyn barysynda aýdan-qala basshylary óńirlerde qalyptasqan jaǵdaimen tanystyryp, sý basqan eldi mekenderdegi apat saldaryn joiý jumystary týraly baiandady. Máselen, sońǵy birneshe kún boiy jaýǵan jańbyrdyń sońy Óskemen men Ridder qalalarynda, sondai-aq Glýbokoe, Shemonaiha, Katonqaraǵai, Zyrian aýdandarynda sý tasqynyna ulasyp, nátijesinde birqatar eldi meken halqy qaýipsiz jerge kóshirilgen. Sońǵy málimetke súiensek, oblys boiynsha 481 jeke turǵyn úidiń ieleri qyzyl sý zardabyn tartqan. Bul apat ásirese Glýbokoe aýdanynyń halqyna aýyr tidi. Mundaǵy Beloýsovka, Predgornoe jáne Progress siiaqty eldi mekenderdiń turǵyndary qinalyp qaldy. Aýdan boiynsha 175 turǵyn úidi sý basyp, 565 adam qaýipsiz jerge kóshirilgen eken. Selektorlyq jiyn aldynda Progress aýylynda arnaiy baryp qaitqan oblys ákimi jergilikti turǵyndarmen kezdesip, tabiǵi apattan zardap shekkenderge mindetti túrde kómek kórsetiletinin jetkizdi.
– Jańa ǵana Glýbokoe aýdanynan keldim. Ras, ondaǵy jaǵdai máz emes. Degenmen, jergilikti halyq sabyrlyq tanytýda. Sol úshin jerlesterime alǵys aitamyn. Qalai bolǵanda da, biz olardy qoldaýsyz qaldyrmaimyz. Zardap shekkenderge mektepten ýaqytsha turatyn oryndar bólindi. Progrestikterge birneshe kúnniń ishinde keltirilgen shyǵyn mólsheri anyqtalyp, úileri turýǵa jaramsyz bolyp qalǵandaryna jańa baspana beriletinin jetkizdim. Qajet jaǵdaida, bul maqsatqa Beloýsovkadaǵy 50 páterli úiden baspana bóletin bolamyz. Buǵan qosa, baspana máselesin tez arada sheshý úshin Glýbokoe aýdanyna oblystyq biýdjetten 60 million teńge bólinbek, – degen oblys ákimi tabiǵattyń tosyn minezine tap bolǵan glýbokoelyqtardyń azyq-túlik, kiim-keshek siiaqty turmystyq qajettilikterine qosymsha 10 million teńge baǵyttalǵanyn da atap ótti.
Aimaq basshysy atap kórsetkendei, dál osyndai jumystar Shemonaiha aýdanynda da júrgiziletin bolady. Atalmysh aýdanda sý tasqynynan 42 úi zardap shekken. Al Óskemen qalasynda 15 úi sý astynda qalǵan. Qazir qyzyl sý álegin tartqan turǵyndardyń úileri men qora-qopsylaryn muz kesekteri men toń batpaqtan tazartý jumystary júrgizilip jatyr. Jaǵdai birtindep qalpyna kele bastaǵandai. Degenmen, jiynda oblys ákimi keibir úiler turýǵa jaramsyz bolyp qalǵanyn aityp, quzyrly mekemeler basshylaryna dalada qalǵan turǵyndardy baspanamen qamtý máselesin tezirek sheshýdi tapsyrdy.
Qaiyrymdylyq qorlary qurylady
– Aiagóz qalasynda úi kezeginde turǵan áli 19 otbasy bar eken. Bul adamdar kóp keshiktirmei baspanaly bolýy kerek. Aýdan basshysy Baqytjan Baiahmetovke úsh kúnniń ishinde bul máseleni sheshýdi tapsyramyn. Sonymen qatar shahardaǵy sý tasqynynan zardap shekken taǵy 109 úidi jóndeý jumystaryn bastaý qajet. Bul jumystardyń jobalyq-smetalyq qujattamasy ázir. Sondyqtan iske kirisý kerek. Dál osyndai jumys Shemonaiha jáne Glýbokoe aýdandarynda da júrgizilýi tiis. Jer-jerde komissiialar quryldy, shyǵyn mólsheri anyqtalýda. Alaida jergilikti ákimder qujattar daiyn bolǵan kezdi kútip, qol qýsyryp otyra bermei, qazirden bastap sol eldi mekenderde satylymǵa shyǵarylǵan turǵyn úilerdi satyp alý jaǵyn oilastyra berýi qajet. Qazirgi basty maqsatymyz – mektepter men týystaryn panalap otyrǵan jerlesterimizdi úimen qamtamasyz etý, – degen oblys ákimi sonymen qatar Katonqaraǵai aýdanynyń ákimine de Úlken Narynda qarǵyn sýdan búlingen úsh úidiń ielerine tezirek jańa baspana taýyp berýdi júktedi.
Aimaq basshysy sondai-aq aldaǵy ýaqytta Shyǵys Qazaqstanda tiisti qaiyrymdylyq qorlary qurylyp, olarǵa oblystyq qazynadan qomaqty qarajat bólinetinin jetkizdi.
– Aýdandardaǵy qalpyna keltirýge bolatyn úilerdi jóndeitin bolamyz. Bul úshin Óskemennen qurylysshylardy shaqyrtamyz. Taǵy bir másele, aryqtardy tazalaýǵa qatysty. Búgin Progress siiaqty eldi mekenderge áskeriler jiberilip, aýyldaǵy aryqtardy tazalaý jumystaryna tartylýda. Biraq bolashaqta mundai is-sharalardy jergilikti turǵyndardyń ózderi júrgizýi tiis. Osyny aýyl-aimaqtaǵy aǵaiynǵa túsindirip aityńyzdar, – dedi oblys ákimi Danial Ahmetov.
Jiyn barysynda sonymen qatar, oblystyq tótenshe jaǵdailar departamentiniń tehnikalyq bazasyn jetildirý maqsatynda jergilikti biýdjetten qomaqty qarajat bólinetini belgili boldy. Aimaq basshysynyń aitýynsha, atalmysh departament respýblikalyq biýdjetten qarjylandyrylatynyna qaramastan, oblys basshylyǵy qutqarýshylarǵa 289 million teńge bólgen eken. Aldaǵy ýaqytta bul somanyń mólsheri ulǵaiatyn bolady.
Nurjan Kenjeuly
