Jetisý oblysy qurylǵannan beri bilim berý infraqurylymyn damytýǵa erekshe kóńil bólinip keledi. Osy ýaqyt aralyǵynda 26 jańa bilim berý nysany salynyp, 33 nysanǵa kúrdeli jóndeý júrgizildi, beiimdelgen mektepterdiń sany eki esege qysqardy. Sonymen qatar pedagogterdi júieli qoldaý jáne muǵalim mamandyǵynyń bedelin arttyrý baǵytyndaǵy jumystar jalǵasýda. Atap aitqanda, Muǵalimder kúnine orai óńirdiń 350-den astam pedagogi marapattaldy, olardyń 9-y memlekettik nagradalarǵa ie boldy. Pedagogterdi kásibi merekesimen oblys ákimi Beibit Isabaev Taldyqorǵan qalasyndaǵy Biken Rimova atyndaǵy akademiialyq drama teatrynda ótken saltanatty sharada quttyqtady, dep habarlaidy dalanews.kz.
Quttyqtaý sózinde Beibit Isabaev óskeleń urpaqty tárbieleý men qoǵamdy damytýda pedagogterdiń airyqsha ról atqaratynyn atap ótti.
– Memleket basshysy Qasym-Jomart Toqaev tamyz keńesinde: «Adamdy, onyń dúnietanymyn ózgertý tek naǵyz tálimgerdiń qolynan keledi», - dep atap ótti. Qoǵamda zań men tártipke, tazalyq pen mádeniettilikke negizdelgen jańa etikany qalyptastyrý isi osy mańyzdy missiiadan, iaǵni mektep qabyrǵasynan bastalady. Balalarymyzdyń bilim alýy ǵana emes, tárbiesi, ómir qiyndyqtaryna daiyn bolýy jáne adamgershilik qasieti da sizderdiń jumystaryńyzǵa tikelei bailanysty. Sondyqtan pedagogterdi qoldaý men olardyń eńbegine laiyqty jaǵdai jasaý – memlekettiń basym mindetteriniń biri, – degen oblys ákimi bilim berý infraqurylymyn damytý jáne óńir pedagogterin qoldaý sharalaryna keńinen toqtaldy.
Ózin-ózi jetildirýdegi jetistikterimen, shyǵarmashylyq izdenisterimen, oqytýdyń jańa tásilderi men ádisterin tiimdi qoldanýymen erekshelengen birqatar pedagogti atap ótken óńir basshysy muǵalimderdiń kásibiligi men óz isine degen adaldyǵy olardyń shákirtteriniń jetistikteri men tabystarynan kórinetinin aitty. Bul rette aýyl mektepteri oqýshylarynyń arasynda ótetin «Myń bala» olimpiadasynda 33 bala jeńimpaz atansa, 14 oqýshy elimizdiń úzdik litseilerinde tegin bilim alýǵa joldama alǵan. Sonymen qatar sońǵy 4 jylda óńir oqýshylary halyqaralyq olimpiadalar men ziiatkerlik baiqaýlarda 73 júldeli orynǵa ie boldy, onyń 13-i altyn, 28-i kúmis jáne 32-si qola medal.
Pedagogterdiń biliktiligin arttyrý jumystaryna da erekshe kóńil bólinýde. Atap aitqanda, oblys pedagogteriniń 85,5%-y oqý protsesinde jasandy intellektini qoldaný baǵytyndaǵy oqýdan ótti. 12 myńnan astam muǵalim biliktiligin arttyrsa, 14 myńnan astam pedagog sanatyna sáikes laýazymdyq jalaqysyna ai saiynǵy ústemeaqy alady. Sondai-aq jyl saiyn «Úzdik pedagog» baiqaýy uiymdastyrylyp, onyń qorytyndysy boiynsha jeńimpazdarǵa memlekettik granttar tabystalady. Sondai-aq sońǵy 4 jylda 1400 jas mamanǵa «Diplommen - aýylǵa» baǵdarlamasymen kóterme aqy, sondai-aq 554 mamanǵa turǵyn úi satyp alýǵa jeńildetilgen nesie berildi.
- Oblys qurylǵannan beri jan-jaqty qoldaýdyń arqasynda óńirimizdiń 29 pedagogi joǵary memlekettik nagradalarǵa ie boldy. Pedagog-sheberlerimiz de erekshe qurmetke bólendi. Olardyń barlyǵy Ybyrai Altynsarin atyndaǵy tósbelgimen marapattaldy, – dedi B. Isabaev marapattaý rásimine kóship.
Osy jiynda 8 pedagogke joǵary memlekettik nagralar berilip, olarǵa «Qurmet» ordeni, 2 «Eren eńbegi úshin» medali jáne 5 «Shapaǵat» medali berildi. Taǵy 5 pedagog «Ybyrai Altynsarin» medalimen marapattaldy. Eske salsaq, búgin Astanada Muǵalimder kúnine orai Prezidenttiń qatysýymen ótken saltanatty jiynda Taldyqorǵandaǵy Muhtar Aryn atyndaǵy № 24 mamandandyrylǵan litseiiniń muǵalimi Aiman Jantileýova «Qazaqstannyń eńbek sińirgen ustazy» qurmetti ataǵyna ie bolǵan edi.
Sondai-aq óńir basshysy oblystyq baiqaý nominatsiialarynyń jeńimpazdaryn da marapattady. Atap aitqanda, «Úzdik synyp jetekshisi» atalymynda Alakól aýdany A. Baitursynuly atyndaǵy orta mekteptiń 8-synyp jetekshisi Móldir Túsipbekova jeńimpaz atandy. «Úzdik aýyl mektebi» atalymynda Kerbulaq aýdany Sh. Ýálihanov atyndaǵy orta mektep úzdik dep tanylsa, «Úzdik balabaqsha» atalymynda Kóksý aýdanynyń «Alpamys» bóbekjai-baqshasy jeńimpaz atandy. Sarqan aýdany Abai atyndaǵy mektep-gimnaziianyń qazaq tili men ádebieti pániniń muǵalimi Aida Arǵynbaeva «Jetisý ustazy» atalymynyń jeńimpazy boldy. Jeńimpazdarǵa aqshalai sertifikattar tabystaldy.
Saltanatty sharanyń resmi bólimi óńirdegi mektep oqýshylary men kolledj stýdentteriniń qatysýymen daiyndalǵan merekelik kontsertke jalǵasty.
- Búgin men úshin óte qýanyshty kún. Ustazdar merekesinde memlekettik nagradaǵa ie bolyp otyrmyn. Bul jalǵyz meniń ǵana eńbegim emes, barsha ustazdardyń adal qyzmetiniń baǵalanǵany dep bilemin. Memleket basshysy bilim salasyn damytýǵa erekshe kóńil bólip keledi. Sondyqtan elimizdiń erteńi bolatyn jas urpaqty bilimdi ári tárbieli etip ósirýge bar kúsh-jigerimizdi jumsaimyz, - dedi «Qurmet» ordaneniń iesi, M. Aryn atyndaǵy №24 mamandandyrylǵan litseidiń direktory Gúljanar Espanova.
– Eń aldymen, ustaz eńbegine erekshe kóńil bólinip jatqany úshin alǵys aitqym keledi. Bilim salasynda júrgenime 42 jyl boldy. Búgingi marapat – tek meniń ǵana eńbegimniń nátijesi emes, bul – búkil pedagogikalyq ujymymnyń eńbegi, áriptesterimniń qoldaýy, ata-analardyń senimi jáne árine shákirtterimniń jetistikteriniń jemisi. Barsha ustazdardy búgingi merekemen quttyqtaimyn, – dedi «Eren eńbegi úshin» medalimen marapattalǵan Qaratal aýdany M. Gorkii atyndaǵy orta mekteptiń muǵalimi Oktiabrina Kim.
Onyń sózin taǵy bir áriptesi jalǵady:
– Meniń jumysym jan-jaqty, bilimdi ári ozyq oily jas urpaqty tárbieleý ekenin maqtan tutamyn. Muǵalim mamandyǵynyń qyzyǵy da osynda. Barlyq bastamalarymyzǵa qoldaý kórsetip kele jatqan memleketimizge alǵys aitamyn. Túrli baiqaýlarǵa qatysyp, ózimizdi ár qyrymyzdan kórsetýge múmkindik kóp. Biz ártúrlimiz, biraq barlyǵymyz ortaq iske qyzmet etip kelemiz. Merekelerińizben, qurmetti áriptester! – dedi Tekeli qalasyndaǵy №4 orta mekteptiń «Sheber» sanatyndaǵy muǵalimi Natalia Banetskaia.
Atap ótsek, qazirgi tańda Jetisý oblysynda 19 myń pedagog eńbek etedi. Biylǵy oqý jylynda Rýdnichnyi jáne Suptai aýyldarynda jańa mektepter iske qosyldy. Al Respýblika kúni qarsańynda Kóksai aýylynda jańa mektep pen Taldyqorǵan qalasynda «Bilim-innovatsiia» litseiiniń jańa ǵimaraty esigin aiqara ashady. Sonymen qatar Qaratal aýdanynyń Úshtóbe qalasynda, sondai-aq qaitarylǵan aktivter esebinen Kóksý aýdanynyń Balpyq bi aýylynda árqaisysy 600 orynǵa arnalǵan mektepter salynýda. Budan bólek, jyl sońyna deiin óńir mektepteri fizika, himiia jáne biologiia pánderine arnalǵan 240 zamanaýi kabinetpen jabdyqtalady.
