Bul jaiynda Reseidiń Syrtqy ister ministri Sergei Lavrov arnaiy málimdeme jasap, Ózbekstannyń bul sheshimine dán riza ekenin aitty.
Onyń atap ótkenindei Eýraziialyq odaqtyń yqpalyn arttyryp, qulashyn keńeite túsý uiymnyń basty muratynyń biri.
“Odaqtas elder sonyń negizinde alys-barys, barys-kelisti jaqsartyp, ekonomikalyq ál-qýatyn kóterýge múmkindik alady”, – deidi Lavrov.
…
Ózbekstannyń Eýraziialyq odaqtyń quramyna baqylaýshy retinde qosylýy Kreml ideologtarynyń kópten beri kóksep júrgen armany. Máskeý bul máseleni Ózbekstannyń óz ishindegi reseishil saiasatkerlerdiń aýzyna salyp, Mirziiaev prezident bolǵaly belsendi úgitteýmen keldi.
Budan buryn ózbek úkimeti “Eýraziialyq odaqpen áriptesýdiń joldaryn izdep jatqanyn” málimdegen.
Sonyń aldynda Dalanews.kz-ke suhbat bergen ózbek sholýshysy Bahtiiar Erǵashev Kremldiń Ózbekstandy uiymǵa qosýǵa yntyq ekenin, Kárimov biligi kezinde Tashkenttiń osy blokqa umtylmaǵanyn aitqan.
Bilikke Shavkat Mirziiaev kelgen tustan odaqqa qosylý týraly talqylaýlar qaita qyzǵan.
"Baqylaýshy statýsy bizdiń elge tiimdi. Óz basym bolashaqta Ózbekstannyń osy odaqqa birjolata ótip ketpei, erkin saýda aimaǵymen ǵana shektelýin qoldaimyn. Sonyń ózi jetkilikti.
Álbette ózbekterdiń óz arasynda osy odaqqa qosylýdy quptaityndar kóp.
Olardyń ýáji: "ázir Reseide jan baǵyp júrgen 2,5 mln-ǵa tarta ózbek migranty (buǵan Qazaqstandaǵy ózbektiń 500 myńǵa jýyq jumys kúshin qosyńyz) jarytyp jalaqy alyp, jumys jaǵdaiyn jaqsartýǵa múmkindik alady". Ózbekstannyń toqyma-tigin óndirisi, bylǵary daiyndaityn, aiaq kiim tigetin óndirýshiler taýaryn odaq naryǵyna shyǵarýǵa qulshynyp otyr. Biraq taiaqtyń eki ushy bar emes pe?
Eýraziialyq odaqqa óter bolsa, ózbektiń avtokólik óndiris japa shegedi.
Jylyna 200 myń kólik qurastyratyn Ózbekstannyń áleýetin dál osy aralyqta 2 mln kólikti saýdaǵa shyǵaratyn Reseimen salystyrýǵa bolmaidy. Mundaida ádil báseke týraly aitýdyń ózi orynsyz.
Ózbekstan osy odaqqa ótse, kúlli ekonomikanyń kúretamyry sanalatyn kólik óndirisin kúlge kómedi", – degen edi saiasattanýshy.
Eýraziialyq ekonomikalyq odaqty (EAEO) Resei 2015 jyly Belarýs jáne Qazaqstanmen birge qurdy. Keiin uiymǵa Armeniia men Qyrǵyzstan kirdi.
