Tarıh úshin sonshalyqty zor kezeń bolmaǵanymen, osy jyldar ishinde ǵasyrlarǵa bergisiz qyrýar ister atqaryldy. Áleýmettik- ekonomıkalyq, qoǵamdyq-saıası, qaýipsizdik máselelerinde, onyń ishinde jahandyq óńirlik problemalarǵa qatysty óz aldyna derbes sheshim qabyldaı alatyn, óz ustanymyn pash ete alatyn egemen memleket bola alatynymyzdy barlyq qyrynan aıqyndap, moıyndattyq. Halyqaralyq bastamalarmen birge, álemdik deńgeıdegi is-sharalardy, dúnıejúzilik, adamzattyq mańyzdy forýmdardy da joǵary deńgeıde uıymdastyratyn jurt ekenimizdi tanyttyq. Al, túptep kelgende, bunyń barlyǵy derbestiktiń, Táýelsizdigimizdiń arqasy.
Búgin elimizdiń eń úlken merekesi saltanatty jaǵdaıda atalyp ótti.
Áýeli otyrarlyqtar men qonaqtar mádenıet saraıynyń foıesinde ornalasqan tylsym tarıhtan, táýelsizdik jyldarynda qol jetken jetistikter týraly daıyndalǵan kórmeni tamashalady. Merekelik jıynnyń shymyldyǵy túrilgen soń memlekettik Ánuran shyrqalyp, aýdan ákimi Erlan Aıtahanov pen máslıhat hatshysy Myrzahan Manapovtar kópshilikti qasterli merekemizben quttyqtady. Jıyndaǵy alǵashqy quttyqtaý sózdi alǵan aýdan ákimi:
– Ǵasyrlar boıǵy halqymyzdyń armany 1991 jyly 16 jeltoqsanda, búgingi býynnyń tarıhı tańdaýyna aınaldy. Bul kún óz taǵdyrymyzǵa ózimiz qojalyq etip, óz bolashaǵymyzdy ózimiz aıqyndaýǵa qolymyz jetken uly kún boldy» dep Elbasymyz Nursultan Nazarbaev aıtqandaı elimizdi az ǵana ýaqyttyń ishinde álemniń kóptegen bedeldi elderi táýelsizdigin moıyndap, dıplomatıalyq baılanystar ornatty. Búginde egemen elimiz kún sanap kórkeıip, jahandyq básekege qabiletti eldermen ıyq tirese, rýhanı jańǵyrý jolyna túsip keledi.
Táýelsizdiktiń alǵashqy jyldarynan-aq elimiz egemendiktiń eń negizgi alǵy sharttaryn jasaı aldy. Bárinen buryn kóp ultty, kóptildi, kóp dindi elde halyqtyń aýyz birligin saqtaýǵa qol jetkizildi. Qazaqstandy meken etken barlyq ulttardyń múddesin ortaqtastyra alǵany – Elbasymyzdyń danalyq saıasatynyń aıqyn aıǵaǵy edi. Onyń nárli jemisin ózimizdiń aýdan ómirinen de kórýge bolady. Aýdanymyzda Keńes Odaǵynyń batyrlary Temirbek Ibragımov, Seıitqasym Áshirov jáne Uly Otan soǵysyna qatysýshy maıdangerlerdiń qurmetine arnalǵan memorıaldyq keshen, «Shámshi» saıabaqtary jáne «Oqsyz» sport kesheni paıdalanýǵa berildi. Bir sózben aıtqanda, otyrarlyqtar áli de talaı asýlardy asyp, talaı bıikterdi baǵyndyratyn bolady. Endeshe bárimizge mańyzdy bolyp sanalatyn Táýelsizdik kúni – óskeleń urpaqqa aman-esen, tórteýi túgel bolyp beriletin amanat. Biz qaıda júrsek te elimizdi, tilimizdi, dilimizdi, dinimizdi jáne salt-dástúrimizdi súıý, qurmetteý bizdiń basty maqsatymyz, – dep, Táýelsizdigimizdiń baıandy bolýyn tiledi.
Munan soń aýdan basshysy eseli eńbekterimen elge tanylǵan aýdandyq máslıhattyń bir top depýtattaryna "Oblystyń qurmetti depýtaty" tósbelgisin tabystasa, birqatar azamattarǵa Alǵys hattar jáne "Aýdannyń qurmetti azamaty" kýáligi men tósbelgilerin tapsyrdy.
Saltanatty jıyn odan ári ata-babamyzdyń san ǵasyrlar boıy arman etken Táýelsizdiktiń eń qudiretti syıymyz ekenin beıneleıtin kompozısıalyq qoıylymmen jalǵasyp, ásem án men kúmbirlegen kúı kópshilikke merekelik kóterińki kóńil-kúı syılady.
