«Óte mańyzdy» kitaby jaryq kórdi
Almaty qalasynda belgili kásipker, metsenat Dýlat Tastekeidiń «Óte mańyzdy» kitabynyń tusaýkeser rásimi ótti. Sharaǵa ziialy qaýym ókilderi, kásipkerler, BAQ ókilderi qatysty.
«Óte mańyzdy» kitabynda kásibin shaǵyn nesie uiymynan bastap, Qazaqstannyń barlyq óńirinde filialdaryn órkendetip, qarjy kompaniiasyna ainaldyrǵan kásipkerdiń biznes joly, jeke tájiribesi, túigenderi men bilgenderi qamtylǵan. Bul kásip bastaýǵa nietti kez kelgen oqyrman úshin paidaly týyndy bolmaq.
«Óte mańyzdy» kitabynyń taqyryby aityp turǵandai, óz kásibin dóńgeletkisi keletin kez kelgen janǵa bizneste neniń mańyzdy ekenine jol silteidi. Eger siz úshin ideiadan iske, isten tájiribege jedel órleý mańyzdy bolsa, endeshe «Óte mańyzdy» kitaby sizge arnalǵan! Kitapta avtor tabysty kásipker retinde óziniń tolaiym tájiribesimen bólisip, biznestiń qyr-syrymen tanystyrady. Jalpy, qazirgi ýaqytta jeke kásibin ashýǵa talaptanyp júrgen otandastarymyzǵa arnalǵan ana tilimizdegi saýatty kómekshi quraldar sanaýly. Sol turǵydan, belgili kásipker, metsenat Dýlat Tastekei osy tektes eńbekteri arqyly qarjy naryǵyn qazaqshalandyrýǵa da úles qosyp júrgenin aita ketý kerek.
Eńbek jalpy kásipkerlikke, bizneske qyzyǵýshylyq tanytqan barsha oqyrmanǵa, qalyń qaýymǵa, jastarǵa, joǵary oqý oryndarynyń stýdentterine arnalǵan. Avtor biznes taqyrybyn búgingi kózqaras turǵysynan jiti saralaǵan, jete zerttegen. Qazirgi ýaqyttaǵy biznestiń jańa quraldaryn igersem-bilsem, zerdelesem, toqysam, úirensem degen kóziqaraqty kásip bastasam degen jurtshylyqqa, ásirese jastarǵa alar tálim jetip artylady. Kitap qarapaiym tilmen jazylǵan. Eki myń dana taralymmen AmalBooks baspasynan jaryq kórgen atalǵan kitap kórkem bezendirilgen.
