Óskemen qalasynda S.Amanjolov atyndaǵy Shyǵys Qazaqstan ýnıversıtetinde Qazaqstan Respýblıkasy Prezıdentiniń janyndaǵy Qazaqstan Respýblıkasynyń Ulttyq ǵylym akademıasy Prezıdıýmynyń kóshpeli otyrysy ótti. Aıtýly sharada óńirlik ǵylymdy damytýdyń ózekti máseleleri men onyń áleýmettik-ekonomıkalyq damýdaǵy róli talqylandy.
Otyrysqa Shyǵys Qazaqstan, Abaı oblystarynyń ákim orynbasarlary, Pavlodar oblysy ákimdiginiń basqarma basshysy, QR Parlament májilisiniń depýtattary, QR Prezıdentiniń janyndaǵy QR UǴA akademıkteri, «Ulttyq agrarlyq ǵylymı-bilim berý ortalyǵy» KeAQ, «Ǵylym qory» AQ, «KAZSINK» JSHS, «Úlbi metalýrgıalyq zaýyty», «Óskemen armatýralyq zaýyty» AQ, «QR ulttyq ıadrolyq ortalyǵy» RMK, «Óskemen tıtan-magnıı kombınaty» AQ, «Iadrolyq tehnologıalar parki» AQ, «PlasmaScience» JSHS, JOO jáne ǵylymı mekemelerdiń, óńirlik bıznes sýbektileri men ındýstrıanyń birinshi basshylary, óńirdiń jetekshi ǵalymdary, sondaı-aq BAQ ókilderi qatysty. Qatysýshylar óńirdegi ǵylymnyń damý perspektıvalaryn, ónerkásip pen áleýmettik salalarmen ıntegrasıasyn talqylady.
Otyrystyń ashylý saltanatynda sóz sóılegen Ulttyq ǵylym akademıasynyń Prezıdenti Aqylbek Kúrishbaev óńirlik ǵylym – aımaqtyń turaqty ınovasıalyq damýynyń negizi ekendigin atap ótti jáne Qazaqstandaǵy ǵylymdy damytýǵa memleket basshysy Q.Q. Toqaevtyń qoldaýymen úlken kóńil bólinip jatqanyna nazar aýdardy.
Óz sózinde spıker ǵylymnyń praktıkalyq mańyzyn arttyrý, ony qoǵam men ekonomıkanyń ozyq damýyn qamtamasyz etetin naqty ekonomıkalyq resýrsqa aınaldyrý úshin ǵylymı zertteýlerdi uıymdastyrýdyń zamanaýı júıesin qurý kerektigin aıtty. Bul turǵydan alǵanda, óńirlik ǵylymdy damytý - ınovasıalardy ilgeriletýdiń, ekonomıkanyń naqty sektory men ǵylymnyń baılanysyn nyǵaıtýdyń negizgi faktory ekendigine toqtaldy.
«Damyǵan elderdiń tájirıbesi qazirgi tańda jahandyq problemalardyń neǵurlym turaqty ekonomıka men qoǵamdy qurýda jekeleı ári maqsatty tásilmen sıpattalatyn jergilikti kontekstke aýysqanyn kórsetip otyr. Osyǵan sáıkes, bul maqsatqa qol jetkizý quraly retinde Óńirlik ınovasıalyq ekojúıeler (ÓIJ) tujyrymdamasy belsendi damyp keledi, bul tujyrymdama memlekettik jáne jeke sektorlardyń ártúrli sýbektilerin ortaq mindetter men maqsattar tóńiregine biriktiredi, ǵylym júıesin azamattardyń ómirin jaqsartatyn, básekege qabilettilikti arttyratyn jáne ósýdi yntalandyratyn ınovasıaǵa aınaldyrýǵa yqpal etedi. Óńirlik ınovasıalyq ekojúıelerdiń ózegi - óńirlik ǵylym. Ókinishke qaraı, Qazaqstanda óńirlik ǵylymnyń jaǵdaıy áli de bolsa tómengi deńgeıde», dedi A.Kúrishbaev.
Sonymen qatar, óńirlik ǵylym eń aldymen oblystyń ekonomıkasyn damytý máselelerin sheshýge, joǵary tehnologıalyq sheshimderdi dál osy aımaqtarǵa engizýge baǵyttalýy tıis ekendigine mán berildi.
«Sondyqtan Ulttyq ǵylym Akademıasy BNQ (PSF) jáne mega granttar úshin naqty basymdyqtardy belgileý jáne taqyryptardy aıqyndaý mindetin alǵa qoıyp otyr, olar eń aldymen, bolashaqtyń syn-tegeýrinderin, óńirdiń jáne salanyń mindetterin sheshýge baǵyttalýy tıis. Qazirgi ýaqytta biz 6 basym baǵyt boıynsha ǵylymı zertteýler júrgizýdiń 200 perspektıvalyq taqyrybyn aıqyndadyq jáne óńirlerde, «Atameken» UKP, salalyq mınıstrliktermen talqylaýlar júrgizýdemiz», dep atap ótti A.Kúrishbaev.
Shyǵys Qazaqstan oblysy ákiminiń orynbasary E. Nurǵalıev óz sózinde aımaqtar ulttyq progrestiń negizi ekenin jáne erteńgi kúnniń mindetterin sheshý úshin olardyń ınovasıalyq áleýetin paıdalaný qajettigin atap ótti. Ol ǵalymdar men bıznes ókilderi arasyndaǵy ózara baılanysty nyǵaıtyp, óńirlik kásiporyndarda ázirlemelerdi is júzinde engizýdiń mańyzdylyǵyna toqtaldy.
Abaı oblysy ákiminiń orynbasary J. Sársebaev óz baıandamasynda aımaqtyq ǵylymnyń óńirdiń turaqty damýyna qosatyn mańyzdy úlesin atap ótip, ekonomıkalyq jáne áleýmettik máselelerdi sheshýde taý-ken ónerkásibi, aýyl sharýashylyǵy, ekologıa jáne IT-tehnologıalar salalaryndaǵy ınovasıalardy engizýdiń mańyzdylyǵyn atap kórsetti.
«Atyraý ýnıversıteti» KEAQ dırektorlar keńesiniń tóraǵasy, fılologıa ǵylymdarynyń doktory, profesor Mamraev Beıbit Baımaǵambetuly óz baıandamasynda «ákimdik – ǵylym – bıznes» formýlasynyń áli de tıimdi júzege aspaı jatqanyn atap ótti. Onyń basty sebepteri retinde ǵylymdy qarjylandyrýdyń jetkiliksizdigi men bólingen qarajattyń tıimsiz paıdalanylýyn atady. Osyǵan baılanysty, ol aldaǵy jylda forsaıt boljam jasap, onyń naqty iske asyrý josparyn anyqtaýdy usyndy jáne eldiń shyǵysynda UǴA fılıalyn ashý osy bastamalardyń sátti júzege asýyna yqpal etýi múmkin ekenin atap ótti.
Otyrys aıasynda «Geologıa, mıneraldy jáne kómirsýtek shıkizatyn óndirý jáne óńdeý, jańa materıaldar, tehnologıalar» jáne «Sý resýrstaryn, janýarlar men ósimdik álemin, ekologıany tıimdi paıdalaný» baǵyttary boıynsha boljamnyń aralyq nátıjelerin talqylaý forsaıt sesıasynda ǵalymdar ózderiniń zertteýleri men ázirlemelerin usyndy. «Ǵylym-bıznes» formatyndaǵy sesıada kommersıalızasıaǵa daıyn bolashaqty jobalaryn usyndy. Qatysýshylar ǵylymı qaýymdastyq pen bıznes arasyndaǵy yntymaqtastyqtyń múmkindikteri talqyǵa salyndy.
Otyrysta ǵalymdar, memlekettik mekemelerdiń ókilderi, bıznes jáne qoǵam ókilderi arasyndaǵy dıalog ornap, qatysýshylar ózara tájirıbe almasyp, ıdeıalarmen bólisip, Qazaqstandaǵy aımaqtyq ǵylymdy damytý úshin birlesken sheshimder ázirledi.
Kóshpeli otyrys aıasynda óńirdiń ónerkásiptik kásiporyndarymen yntymaqtastyq týraly 4 memorandýmǵa qol qoıylyp, otyrys nátıjesi boıynsha óńirlik ǵylymdy damytýdy sheshýge baǵyttalǵan qarar qabyldandy.
D. Serikbaev atyndaǵy Shyǵys Qazaqstan tehnıkalyq ýnıversıtetinde QR Prezıdentiniń janyndaǵy QR Ulttyq ǵylym akademıasynyń Óskemen qalasyndaǵy fılıaly, S.Amanjolov atyndaǵy Shyǵys Qazaqstan ýnıversıtetinde QR Prezıdentiniń janyndaǵy QR Ulttyq ǵylym akademıasynyń óńirlik forsaıt ortalyǵy saltanatty túrde ashyldy.
