Qazaqstanda saiasi partiialardy biýdjet esebinen qarjylandyrý tártibine ózgerister engizilmek. Tiisti ózgeris qamtylǵan qujatta bul biýdjet júktemesin azaitý úshin jasalyp otyrǵany aitylady, dep habarlaidy Dalanews.kz.
Osy sipattaǵy qaýly mátinin qoǵamdyq talqyǵa usyna otyryp, QR Ortalyq sailaý komissiiasy "Ashyq NQA" saityna ornalastyrdy.
Búginderi saiasi partiialardy biýdjettik qarjylandyrý eń tómengi jalaqy mólsherine súiene otyryp, esepteledi. Atap aitqanda, ol saiasi partiialarǵa daýys berý kezinde sailaýshynyń bergen árbir daýysy úshin ETJ-nyń 3%-yn eskere otyryp aiqyndalady. Al jańa ózgeriske sáikes, endi esepti eń tómengi eseptik kórsetkishti (0,65 bóligi) paidalaný arqyly júrgizý kózdelip otyr.
"Saiasi partiialardyń qyzmetin qarjylandyrýǵa bólinetin biýdjet qarajatynyń mólsheri tiisti jylǵa arnalǵan respýblikalyq biýdjet týraly zańda, sońǵy sailaýdyń qorytyndylary boiynsha Parlament Májilisinde ókildik etetin saiasi partiialarǵa daýys berý kezinde berilgen árbir sailaýshy daýysy úshin ailyq eseptik kórsetkishtiń 0,65 esebinen aiqyndalady", delingen qujatta.
Bul ózgeris Memleket basshysynyń áleýmettik, meditsinalyq, salyq jáne basqa salalarda eń tómengi jalaqyny eseptik kórsetkish retinde paidalanbaý týraly tapsyrmasyna sai engizilip otyr.
Degenmen, eseptiń jańa tártibi qarjy somasyna aitarlyqtai áser etpeitin syndy. Máselen, 2024 jyly eń tómengi jalaqy 85 myń teńgeni qurady. Sáikesinshe, onyń 3 paiyzy – 2550 teńge. Ailyq eseptik kórsetkish máni 2024 jyly 3692 teńgege teń. Onyń 0,65 bóligi 2399,8 teńge. Aiyrma – 150 teńge shamasynda.
