Astanaǵa Fransıanyń energetıkalyq kompanıasy Électricité de France (EDF) sarapshylary tehnıkalyq saparmen keldi. Sapar aıasynda fransýzdyq EDF sarapshylary Qazaqstan Respýblıkasy Energetıka mınıstrligi men "Qazaqstandyq atom elektr stansıalary" JSHS (QAES) ókilderimen birqatar iskerlik kezdesýler ótkizdi, dep habarlaıdy Dalanews.kz.

Kelissóz barysynda atom energetıkasy salasyndaǵy ekijaqty yntymaqtastyqtyń negizgi máseleleri, sonyń ishinde tehnıkalyq jobalardy birlese júzege asyrý múmkindikteri talqylandy.

"Atalǵan is-sapar aıasynda EDF ókilderiniń Almaty oblysy Úlken aýylyndaǵy atom elektr stansıasyn salýǵa arnalǵan áleýetti alańdy aralap kórýi josparlanǵan. Bul atalǵan sapardyń mańyzdy tehnıkalyq bóligi, sondaı-aq ol atom elektr stansıasyn salý múmkindikterin aldyn ala zertteýge jáne jobanyń tehnıkalyq talaptaryna sáıkestigin baǵalaýǵa múmkindik beredi. EDF sarapshylarynyń bul sapary atom energetıkasy salasynda birlesken jobalardy júzege asyrý múmkindikterin tyńǵylyqty zerttep, yntymaqtastyqty nyǵaıtý jolyndaǵy mańyzdy qadam sanalady", delingen QAES habarlamasynda.

Aıta ketsek, EDF - álemdegi eń iri atom elektr stansıalaryn basqaratyn kompanıa. Qazirgi ýaqytta EDF jalpy ornatylǵan qýaty 67,2 GVt bolatyn atom parkin qaýipsiz basqaryp otyr (65 reaktor, onyń 56-sy Fransıada ornalasqan), bul álemde paıdalanylatyn barlyq atom elektr stansıalarynyń shamamen 18%-yn quraıdy.