Memleket basshysy premer-ministr Oljas Bektenovti qabyldady,- dep habarlaidy Dalanews.kz.
Oljas Bektenov 2024 jyldyń úshinshi toqsanyndaǵy áleýmettik-ekonomikalyq damý kórsetkishteri týraly baiandady:
– Memleket basshysynyń tapsyrmalaryn júzege asyrý aiasynda ekonomikany ártaraptandyrý sharalary kúsheitilgen;
– esepti kezeńde shikizattyq emes sektordy damytý nátijesinde ishki jalpy ónimniń ósimi 4 paiyzdy quraǵan. Eń joǵary ósimdi aýyl sharýashylyǵy (11,4%), qurylys (10,1%), kólik (8%), bailanys (6,4%), saýda (6,3%), óńdeý ónerkásibi (4,8%) salalary kórsetken. 14 óńirde óńdeý ónerkásibindegi óndiris kólemi artqan;
– biylǵy qańtar-tamyz ailarynda syrtqy taýar ainalymy 91,7 milliard dollardy quraǵan, onyń ishinde eksporttyń úlesi 3,3 paiyzǵa kóbeigen. Oń saýda balansy 34,8 paiyzǵa ósip, 15,4 milliard dollarǵa jetken;
– el biýdjetine 14,9 trillion teńge túsken. Áleýmettik tólemder biýdjet shyǵysynyń negizgi bóligin quraidy;
Úkimet basshysy zańsyz ielengen aktivterdi qaitarý jónindegi tapsyrmalarynyń oryndalý barysy jaiynda aitty:
– jyl basynan beri komissiia 450 milliard teńgege jýyq aktivterdi qaitarý jónindegi kelisimderdi maquldaǵan;
– búginde memleketke 265 milliard teńgeni quraityn aktivter, sonyń ishinde aqshalai 177 milliard teńge qaitarylǵan. Barlyq qaitarylǵan qarajat áleýmettik mańyzy zor jobalarǵa jumsalyp jatyr;
– «Zańsyz iemdenilgen aktivterdi memleketke qaitarý týraly» Zańnyń sýbektileri birqatar jobalardy, atap aitqanda, muqtaj adamdardy ońaltý jáne áleýmettendirý baǵdarlamalaryn, mádeni-bilim berý ortalyǵy men sporttyq manej qurylysyn qarjylandyrýdy bastaǵan;
Islamabadta ótken Shanhai yntymaqtastyq uiymyna múshe memleketterdiń Úkimet basshylary keńesi otyrysynyń qorytyndysy jóninde baiandady.
Prezident Úkimettiń jumysyn jandandyrý qajet ekenin atap ótti. Bul rette el ekonomikasyn ártaraptandyrý arqyly onyń turaqty ósimin qamtamasyz etý, shaǵyn jáne orta biznesti qoldaý, agroónerkásip kesheninde innovatsiiany damytý, iri indýstrialdyq jáne infraqurylymdyq jobalardy júzege asyrý sharalaryn jalǵastyrýdy tapsyrdy.
