Jańa Ózbekstannyń kelbeti qandai bolaryna qatysty boljamymen bólisti osy jiynda Mirziiaev. Óz tusyndaǵy ózgeristerdi, jetistikterdi saýsaq búgip, sanamalap ótti.
Kárimov dáýirindegi tomaǵa tuiyq baǵyttan biratala bas tartqanyn, Tashkenttiń saiasi órnegi ózgergenin taǵy bir márte eske saldy. Eldiń endi qaityp bul súrleýge túspesine senim bildirdi.
Shirai kele Orta Aziianyń Resei yqpalynan arylyp, "bir jaǵadan bas, bir jeńnen qol shyǵararyn" astarlap jetkizdi Mirziiaev.
...
Dalanews.kz Mirziiaevtyń osy májilistegi Ózbekstannyń óz ishi men aimaqtyq saiasatqa qatysty tezisteri men tolǵanystaryn yqshamdap usynady.
“Ózbekstan álemdik qaýymdastyqtan oiyp turyp oryn aldy”, – deidi Ózbek basshysy.
“Demokratiia? Ol bizge tańsyq emes. Halyq biligine arqa súieitin múldem Jańa memlekettiń kirpishin qalaýdamyz.
Azat oilaityn azamattyq qoǵamdy qalyptastyrǵymyz keledi. Ósý úshin de qozǵalys, ózgeris kerek-aq.
Demokratiialyq reformalardy júrdek júrgizýdemiz. Parlamenttiń quziretin kúsheitý, saiasi partiialardyń pármenin arttyrý aktýaldy. Bilikke qoǵamnyń qas-qabaǵynan qaimyǵatyn azamattar kelýi qajet”, – deidi ol.
…
Mirziiaev Kárimovten muraǵa qalǵan memlekette demokratiialyq qundylyqtarǵa múlde kóńil bólinbegenin meńzegen.
“Demokratiianyń temirqazyǵy sanalatyn - adam quqyǵy, sóz bostandyǵy men dini senimge qol suqpaý biz úshin basty ustanym. Osy maqsatta adamnyń, azamattyń quqyn tabanǵa taptatpaityn Ulttyq strategiia qabyldadyq. Uzaq jyl boiy kúrmeýi sheshilmei kelgen keibir keleńsizdiktiń kózin joidyq”, – degen Mirziiaev mektep jasyndaǵy balany jumysqa jegetin zamannyń kelmeske ketkenin aitypty.
…
Tashkentten bastaý alǵan aýqymdy, keshendi reformalar - burynǵy Ózbekstannan ózgerek, jańa Ózbekstannyń irgesin qalaýǵa arqaý bolmaq.
Sói degen Mirziiaev bilik qurǵan qysqa merzimde elde múlde jańa saiasi júie qalyptasqanyn, bul óz kezeginde áleýmet pen ekonomikanyń, ǵylym men mádeniettiń órkendeýine alyp kelgenin málimdegen.
“Ózbekstan óziniń qarjylyq ári ekonomikalyq álýetin joǵaltqan joq. Pandemiiaǵa qaramastan óndiristik potentsialymyzdy arttyra tústik. Amerikanyń J.P Morgan investbanki Ózbekstannyń aiaq alysyna joǵary baǵa berdi.
2017 jyldan beri el ekonomikasy 18 paiyzǵa ósti. Syrtqy saýdanyń kólemi 24 mlrd-tan (2016 jylǵy kórsetkish) 36 mlrd dollarǵa artty. Óndiristik ónimniń quny 369 trln sýmnan asyp jyǵyldy. Óndiristiń ishki jalpy ónimdegi úlesi sońǵy bes jylda 27 paiyzǵa jetti”, – deidi ol.
Byltyr Ózbekstan alys-jaqyn shetelge 15 mlrd dollardyń taýaryn tasymaldaǵan. Bul da bolsa ekonomikadaǵy oń ózgeristiń kórinisi. Ózbek ekonomikasyna qarjy quiǵan sheteldik investitsiianyń kólemi sońǵy jyldary 3 ese artqan. Elde shaǵyn-orta biznestiń sharýasy júrip tur, osy salada 1 mln 400 myńǵa tarta jańa jumys orny qurylypty.
“Kásipkerlikpen ainalysýǵa kedergi keltirip kelgen keseldi zańdardyń kúshin joidyq. Biznespen ainalysatyn aýditoriianyń quqyn qorǵaýdamyz. Men bilikke kelgeli ýaqytta 500 myńnan asa adam jeke kásip ashty. Ózbekstan «Doing Business» reitinginde 141-shi orynnan 69 -orynǵa bir-aq qarǵydy. Bizdiń potentsial munymen shektelmeidi. Naryqtyq ekonomikaǵa tezirek tóselý úshin kásipkerlerge barynsha keńshilik jasalý kerek, olar bizdi alǵa súireitin lokomotiv”, – deidi Ózbekstan basshysy.
…
Mirziiaev eldiń damýyna egemendik alǵan bozala shaqta ómirge kelgen býyn úlken serpin bererine senimdi. Biyl 30-ǵa tolǵan Táýelsizdik tustastary Jańa Ózbekstannyń qabyrǵasyna qalaryna kúmándanbaidy. Dál osy urpaq Orta Aziianyń birigýine de uiytqy bolýy qajet.
“Ózbekstannyń aimaqtyq dárejedegi, álemdik deńgeidegi bedeli artyp keledi. Ashyq saiasat júrgizgenniń jemisin jep otyrmyz. Dialogqa daiynbyz.
Bir kezderi shekaramyzdan shegirtke de ótpeitin. Qazir el azamattary alys-jaqyn shetelge saparlap, sondaǵy týys-týǵandarymen qaýyshyp jatyr. Kórshilermen kirjińdesken kezeń kelmeske ketti. Jaratqan Orta Aziiany aýyzbirshilikten aiyrmasyn.
Sońǵy jyldary aimaq elderiniń yntymaqtastyǵy jańa dárejege kóterildi. Saiasatta “Ortaaziialyq rýh” degen uǵym paida bolady. Iá, Orta Aziianyń rýhyn oiattyq. Aimaqtyń atynan halyqaralyq saiasatqa yqpal eterlik, baǵdar bererlik batyl usynystar aitylýda.
Aramyzdy sýytpai, jii-jii júzdesip turatyn jaqsy dástúr qalyptastyrdyq. Túneýkúni Túrkmenstanda ótken júzdesýde damýdyń jańa baǵyttaryn aiqyndadyq”, – degen Mirziiaev osy oraida Aýǵanstandaǵy ahýalǵa da toqtalypty.
“Ol jaqtaǵy jaǵdaidyń qalai qubylary belgisiz. Bizge bul elde turaqtylyq ornaǵany qajet. Aýǵanstan Orta Aziia men Ońtústik Aziianyń arasyndaǵy ótkel jáne sol missiiasynan aiyrylmaýy kerek.
Ózbekstan Aýǵanstanmen aradaǵy dostyq bailanystardyń úzilmeýine múddeli. Bóten eldiń ishki isine aralaspaimyz, áitse de bul eldegi bilik tranzitiniń yń-shyńsyz ótkenin qalaimyz”, – deidi ol.
Jalpy osy jiynda Mirziiaev jańa Ózbekstan týraly jii-jii aitty. Sol arqyly Kárimovtyń qateliginen sabaq alǵanyn, onyń tusyndaǵy Ózbekstan men búgingi eldiń betalysynda alshaqtyq baryn ańǵartqysy kelse kerek.
Ázirlegen, Dýman BYQAI
