Árbir jarys úzilissiz ótkiziletin úsh kezeńnen turady. Júzý – 3,86 km, velosıpedpen júrý – 180,25 km jáne marafondyq júgirý – 42,195 km. Ironman 70.3 serıalyq saıys eki ese qysqartylǵan qashyqtyqta kelesi saıystardy qarastyrady: júzý – 1,9 km, velosıped jarysy – 90 km jáne júgirý – 21,1 km.
Startqa álemniń 77 elinen 2 200 trıatlet qatyspaqshy. Bul atletterdiń Qazaqstanǵa degen joǵary yqylasyn bildiredi. Eki jyldyq úzilisten keıin elimizde ótetin alǵashqy jarys. Uıymdastyrýshylar Ulybrıtanıa, Úndistan, Germanıa jáne Reseı elderinen trıatletter qatysady dep kútip otyr.
– Mundaı sharany ótkizý áýesqoı sportty ǵana emes, týrızmdi de damytýǵa yqpal etedi. Mysaly, Úndistannan kelgen trıatletter toby 200 adam bolyp ushady, bul bir bortty quraıdy. Sportshylar Qazaqstannyń ońtústigin aralap, elmen tanysatyn bolady. Meniń oıymsha, bul qala men el búdjetine aıtarlyqtaı qrajy túsiredi, – deıdi saıys dırektory Alekseı Sıdorenko.
Esterińizge sala keteıik, IRONMAN starty jyl boıy jer sharynyń túrli elderinde ótedi. Olardyń árqaısysynda maýsymnyń basty starty – IRONMAN álem chempıonatyna qatysýǵa quqyq beretin belgili bir oryndar (slottar) oınatylady. BI Group IRONMAN Kazakhstan Gavaıı, Kalýa-Konada IRONMAN World Championship 2021-de 45 slot oınatylady.
– Basqa elderdegi jarystardyń joıylýyna baılanysty biz jarysta 45 slot oınaýǵa múmkindik aldyq, – deıdi Alekseı.
İs-shara BI-Group holdıńiniń, Nur-Sultan qalasy ákimdiginiń jáne Qazaqstan Trıatlon federasıasynyń qoldaýymen ótedi.
