Biyl jarys Qazaqstan Respýblikasy Táýelsizdiginiń 30 jyldyǵyna arnalyp otyr, dep habarlaidy Nur-Sultan ákimdiginiń resmi saity.
Bul marafonǵa 18 jastan asqan ekpe alǵan jáne PTR-anyqtamasyn usynǵan 16 jastan asqan jelaiaqtar ǵana qatysa alady. Qalada qalyptasqan epidemiologiialyq jaǵdaiǵa bailanysty biyl marafonshylar sany qatań shekteldi. Bul rette qatysýshylardy qabyldaý «Ashyq» júiesi arqyly júzege asyryldy. Al sanitarlyq normalar tolyq saqtalady.
Marafondy uiymdastyrý isin qalalyq dene shynyqtyrý jáne sport basqarmasy qolǵa aldy.
Astana Marathon-2021 aiasynda eki qashyqtyq kózdelgen: 18 jáne odan joǵary jastaǵy qatysýshylar úshin 42.2 km, al 16 jáne odan joǵary jastaǵy qatysýshylar úshin 10 km.
Qatysýshylar EXPO aldyndaǵy alańda belgilengen orynǵa bir saǵat buryn jinala bastady. Tańerteńgi saǵat 6-dan bastap olar jylynyp, áleýmettik qashyqtyqty umytpastan jattyǵýlar jasady. Munda uiymdastyrýshylar shai nemese kofe iship, jylynýǵa bolatyn fýdkort uiymdastyrdy.
«Bul meniń eń alǵashqy marafonym, kópten beri qatysýdy qalap júr edim, endi mine osyndamyn. Mundai aýqymdy sharany uzaq kúttim, ruqsat berilip, endi mine ótip jatyr. Men úshin bul alǵashqy resmi start. Marafondy 42,2 km qashyqtyqta tolyq ótkizemin. Al buǵan shamamen 2 jyl daiyndaldym. Sońǵy 3-4 aida daiyndyǵymdy tipten kúsheittim. Ózim júgirýdi jaqsy kóremin jáne bárin salaýatty ómir salty men sportqa shaqyramyn», – dedi elorda turǵyny Oksana.
Aita ketý kerek, biylǵy marafon qatysýshylar úshin erekshe bolmaq, óitkeni biyl ol "qola" statýsyna ie.
Bronze Label Road Races 2019 jylǵy qarashada World Athletics uiymy tarapynan berilip, TMD aýmaǵynda Astana Marathon osyndai statýsqa ie bolǵan alǵashqy jáne jalǵyz marafon ótkizdi. 2018 jyldan bastap Astana Marathon Halyqaralyq marafondar men jelaiaqatar qaýymdastyǵynyń (AIMS) quramyna kirdi, al 2020 jyldan bastap Abbott World Marathon Majors Wanda Age Group jas erekshelik toptarynda marafonnan álem chempionatynyń biliktilik tobyna endi.
Óz kúshin synaý úshin marafonǵa Qazaqstan óńirleriniń turǵyndary ǵana emes, ózge elderdiń azamattary da keldi.
«Kópten beri sportpen daiyndalǵan joqpyn. Sondyqtan búgin 10 km ǵana júgireiin sheshtim. Bul úlken is-shara», – dep bólisti Shvetsiiadan kelgen qatysýshy Martin.
Qatysýshylar 10 km qashyqtyqta Rysqulov – Qabanbai batyr – Orynbor – Máńgilik El – Rysqulov baǵyttary boiynsha júgiredi.
Al 42.2 km qashyqtyqta júgirý kelesi baǵyt boiynsha ótedi: Rysqulov – Qabanbai batyr – Orynbor – Máńgilik el – Qaldaiaqov – Panfilov – Táýelsizdik – Nájimedenov – Nurmaǵambetov – Baitursynov – Qoshqarbaev – Jumabaev – Momyshuly – Abylai han – Qajymuqan – Jumabaev – Qoshqarbaev – Qonaev – Qazaq radiosy – Dostyq – Máńgilik El – Rysqulov.
«Elordadaǵy marafon – kóńil-kúidi kóteretin, sergitetin oryn. Ózim 2018 jáne 2019 jyldary ótken marafondarǵa qatysqanmyn, sondyqtan tájiribem bar. Biz bul is-sharany kópten kútken edik. Búgin az qashyqtyqta júgiremin, qatysýǵa sońǵy sátte bel býdym. Keshe ǵana dostarymnyń kóbi tirkele bastady, olardan qalmaiyn dep men de úlgerip qaldym. Endi mine osynda turmyn», – dedi elordalyq Áliia.
Esterińizge sala keteiik, is-shara qaiyrymdylyq sharasy bolyp sanalady. Osylaisha, 2009 jyldan bastap Astana Marathon uiymdastyrýshylary qazaqstandyq qaiyrymdylyq uiymdaryna 37 mln teńgeden astam qarajat jinady.
